పవన్ బర్త్ డే స్పెషల్ గా 'భీమ్లా నాయక్' టైటిల్ సాంగ్..!

పవర్ స్టార్ పవన్ కళ్యాణ్ - హ్యాండ్సమ్ హంక్ రానా దగ్గుబాటి కలిసి నటిస్తున్న మల్టీస్టారర్ మూవీ ''భీమ్లా నాయక్''. మలయాళ సూపర్ హిట్ 'అయ్యప్పనుమ్ కొశీయుమ్' చిత్రానికి అధికారిక తెలుగు రీమేక్ గా ఈ మూవీ రూపొందుతోంది. ఇందులో పవర్ ఫుల్ పోలీస్ ఆఫీసర్ పాత్రలో పవన్ నటిస్తుండగా.. రిటైర్డ్ హవల్దార్ రోల్ లో రానా కనిపించనున్నారు. వీరిద్దరి మధ్య అహం ఆత్మ గౌరవం వల్ల ఎలాంటి పరిణామాలు చోటుచేసుకున్నాయనేది ఈ చిత్రంలో చూపించనున్నారు. ఇటీవల విడుదల చేయబడిన పవన్ పాత్రకు సంబంధించిన గ్లిమ్స్ విశేష స్పందన తెచ్చుకుంది. ఈ క్రమంలో మరో లేటెస్ట్ అప్డేట్ తో మేకర్స్ వచ్చారు.

'భీమ్లా నాయక్' టైటిల్ సాంగ్ ను పవన్ కళ్యాణ్ పుట్టిన రోజు సందర్భంగా రిలీజ్ చేయనున్నట్లు చిత్ర నిర్మాతలు వెల్లడించారు. సెప్టెంబర్ 2వ తేదీన ఉదయం గం. 11:16 నిమిషాలకు ఈ పాటను వదలబోతున్నట్లు తెలిపారు. ''మండుతున్న రైఫిల్స్ ప్రతిధ్వనించడానికి సిద్ధంగా ఉన్నాయి.. పవర్ డేని ఒక రిసోండింగ్ పవర్ ఆంతమ్‌ తో జరుపుకుందాం'' అని చిత్ర బృందం పేర్కొంది. ఈ సందర్భంగా టేబుల్ మీద పవన్ గన్ను గురి పెట్టిన ఓ పోస్టర్ ని వదిలారు. ఎస్.ఎస్ థమన్ కంపోజ్ చేసిన ఈ సాంగ్ పవన్ బర్త్ డే ను మరింత స్పెషల్ గా మార్చనుంది.

ఇకపోతే ''భీమ్లా నాయక్'' చిత్రంలో నటిస్తున్న మరో హీరో రానా అభిమానుల అభిప్రాయాలను దృష్టిలో పెట్టుకొని త్వరలోనే డేనియల్ శేఖర్ కు సంబంధించిన అప్డేట్స్ కూడా రిలీజ్ చేస్తారేమో చూడాలి. కాగా సాగర్ కె చంద్ర దర్శకత్వం వహిస్తున్న ఈ చిత్రానికి త్రివిక్రమ్ శ్రీనివాస్ స్క్రీన్ ప్లే - డైలాగ్స్ అందిస్తున్నాడు. ఇందులో పవన్ కళ్యాణ్ సరసన నిత్యామీనన్.. రానా కు జోడీగా ఐశ్వర్య రాజేష్ నటిస్తున్నారు.

పీడీవీ ప్రసాద్ సమర్పణలో సితార ఎంటర్టైన్మెంట్స్ బ్యానర్ పై సూర్య దేవర నాగవంశీ ఈ చిత్రాన్ని నిర్మిస్తున్నారు. రవి కె.చంద్రన్ సినిమాటోగ్రఫీ అందిస్తున్న ఈ చిత్రానికి ఏఎస్ ప్రకాష్ ఆర్ట్ డైరెక్టర్ గా వర్క్ చేస్తున్నారు. నవీన్ నూలి ఎడిటింగ్ బాధ్యతలు నిర్వహిస్తున్నారు. ప్రస్తుతం ఈ సినిమాలో పవన్ ఫ్లాష్ బ్యాక్ ఎపిసోడ్ కు సంబంధించిన సన్నివేశాలను చిత్రీకరిస్తున్నారు. 2022 సంక్రాంతి కానుకగా జనవరి 12న 'భీమ్లా నాయక్' చిత్రాన్ని విడుదల చేయనున్నారు.