ప్యాషన్ అంటే ఇది .. వరుణ్ తేజ్ కి మెగా కితాబు!

వరుణ్ తేజ్ స్టార్ హీరోల రేసులో ఎంట్రీ ఇవ్వడానికి రెడీ అవుతున్నాడు. ఇప్పటికే ఆయన చాలా దగ్గరికి వచ్చేశాడు. ఆరంభంలో కాస్త అడుగులు తడబడినా నిదానంగా కుదురుకుని, నింపాదిగా ముందుకు కదులుతున్నాడు. ఆయన తాజా చిత్రంగా ప్రేక్షకుల ముందుకు రావడానికి 'గని' సిద్ధమవుతోంది. అల్లు బాబీ - సిద్ధు ముద్ద నిర్మించిన ఈ సినిమాకి, కిరణ్ కొర్రపాటి దర్శకత్వం వహించాడు. బాక్సింగ్ నేపథ్యంలో ఈ కథ నడుస్తుంది.

ఆకలి అందరికీ ఉంటుంది .. ఆశయం కొందరికే ఉంటుంది. ఆశయం ఉన్నవాడే విజయం వైపు పరిగెడతాడు. విజయంపై దృష్టి పెట్టినవాడే విజేతగా నిలుస్తాడు అనే కాన్సెప్ట్ తో ఈ సినిమా రూపొందింది. ఈ సినిమాలో తాను పోషించే బాక్సర్ పాత్ర రియాలిటీకి చాలా దగ్గరగా ఉండాలనే ఉద్దేశంతో, వరుణ్ తేజ్ విదేశాలకి వెళ్లి ప్రత్యేక శిక్షణ తీసుకున్నాడు.

ఈ సినిమాలోని పాత్ర కోసం తనని తాను మరింత దృఢంగా మార్చుకోవడానికి గట్టిగానే కసరత్తులు చేశాడు. వరుణ్ తేజ్ పోస్టర్లు చూస్తుంటేనే ఆయన ఏ స్థాయిలో వర్కౌట్లు చేశాడనేది అర్థమవుతోంది.

ఈ సినిమాను డిసెంబర్ 24వ తేదీన విడుదల చేయనున్నట్టు ప్రకటించారు. ప్రచార చిత్రాలతో పాటు వీడియోలు వదులుతూ వెళుతున్నారు. ఇవి సినిమాపై మరింతగా అంచనాలు పెంచుతున్నాయి. ఈ నేపథ్యంలో ఈ సినిమా అప్ డేట్ లను ఎప్పటికప్పుడు చూస్తున్న చిరంజీవి సోషల్ మీడియా వేదికగా స్పందించారు. "ఫెంటాస్టిక్ ట్రాన్స్ఫర్మేషన్ వరుణ్" అంటూ మెచ్చుకున్నారు.

ఒక పాత్ర పట్ల వరుణ్ తేజ్ కి ఎంత ఫ్యాషన్ ఉందనేది .. ఆయన ఎంతగా హార్డ్ వర్క్ చేస్తాడనేది అర్థమవుతోందని అన్నారు. 'గని' సినిమా విజయాన్ని సాధించాలని ఆకాంక్షిస్తూ, ఈ సినిమా టీమ్ కి శుభాకాంక్షలు అందజేశారు. అందుకు 'థ్యాంక్యూ చిరంజీవి గారు' అంటూ స్పందిస్తూ, ఈ సినిమా టీమ్ ఒక పోస్టర్ ను వదిలింది.

యాక్షన్ .. ఎమోషన్ ప్రధానంగా సాగే కథ ఇది. ఈ సినిమాతో సైయీ మంజ్రేకర్ తెలుగు తెరకి పరిచయమవుతోంది. ఆమె గ్లామర్ ఈ సినిమాకి ప్రత్యేకమైన ఆకర్షణగా నిలుస్తుందనే అభిప్రాయాలు వ్యక్తమవుతున్నాయి.

ఈ సినిమాలో సునీల్ శెట్టి ఒక కీలకమైన పాత్రను పోషించాడు. ఇతర ముఖ్యమైన పాత్రల్లో జగపతిబాబు .. ఉపేంద్ర .. నదియా .. నవీన్ చంద్ర కనిపించనున్నారు. తమన్ సంగీతాన్ని అందించిన ఈ సినిమా, తన కెరియర్లో ప్రత్యేకమైన స్థానంలో నిలిచిపోతుందనే నమ్మకంతో వరుణ్ తేజ్ ఉన్నాడు. ఆయన నమ్మకాన్ని ఈ సినిమా ఎంతవరకూ నిలబెడుతుందో చూడాలి.