'ది ఘోస్ట్' కిల్లింగ్ మెషిన్ గ్లింప్స్.. దసరా బరిలో దిగుతున్న కింగ్ నాగ్..!

కింగ్ అక్కినేని నాగార్జున నటించిన లేటెస్ట్ మూవీ ''ది ఘోస్ట్''. క్రియేటివ్ డైరెక్టర్ ప్రవీణ్ సత్తారు దర్శకత్వంలో ఈ హై ఆక్టేన్ యాక్షన్ థ్రిల్లర్ తెరకెక్కుతోంది. ఇప్పటికే విడుదలైన ఫస్ట్ లుక్ విశేష స్పందన తెచ్చుకుంది. ఈ నేపథ్యంలో కిల్లింగ్ మెషిన్‌ ని వదలడంతో మేకర్స్ ప్రమోషన్‌లను ప్రారంభించారు.

'ది ఘోస్ట్' సినిమాలో నాగార్జున ఇంటర్‌ పోల్ ఆఫీసర్‌ గా కనిపించనున్నారు. అయితే అత్యంత శిక్షణ పొందిన, ప్రాణాంతకమైన ఏజెంట్‌ కు కోపం వచ్చినప్పుడు మాత్రం అతనొక అన్ స్టాపబుల్ కిల్లింగ్ మెషిన్ గా మారతాడని తాజాగా రిలీజ్ చేసిన గ్లింప్స్ తో అర్థం అవుతుంది.

ఇందులో నాగ్ రెండు చేతుల్లో రెండు పెద్ద కత్తులు పట్టుకొని శత్రు మూకను ఊచకోత కోయడాన్ని మనం చూడొచ్చు. ఫార్మల్ సూట్‌ లో కింగ్ చాలా క్రూరంగా కనిపిస్తున్నాడు. ఘోస్ట్-కిల్లింగ్ మెషిన్ వీడియో అతని ఆవేశాన్ని కోపాన్ని ప్రదర్శిస్తుంది.

ఘోస్ట్ తో ఎప్పుడూ గొడవ పడకండి అని ఈ వీడియోలో పేర్కొన్నారు. దీనికి బ్యాక్‌ గ్రౌండ్ స్కోర్ అదిరిపోయేలా సెట్ అయింది. విజువల్స్ ప్రధాన ఆకర్షణగా నిలిచాయి. ఈ గ్లింప్స్ సినిమాపై కచ్చితంగా ఆసక్తిని రెట్టింపు చేస్తుంది.

ఇదిలా ఉంటే దసరా కానుకగా అక్టోబర్ 5న ఈ చిత్రాన్ని ప్రపంచ వ్యాప్తంగా థియేటర్లలో విడుదల చేస్తామని తాజా గ్లింప్స్ ద్వారా మేకర్స్ ప్రకటించారు. నాగార్జున కల్ట్ క్లాసిక్ - పాత్ బ్రేకింగ్ మూవీ 'శివ' కూడా 1989 అక్టోబర్ 5న విడుదలైంది. ఇప్పుడు అదే తేదీన 'ది ఘోస్ట్' రిలీజ్ అవుతుండటంతో అక్కినేని ఫ్యాన్స్ ఖుషీ అవుతున్నారు.

ప్రవీణ్ సత్తారు ఈ చిత్రాన్ని అన్ని కమర్షియల్ హంగులతో హై ఇంటెన్స్ యాక్షన్ థ్రిల్లర్‌ గా రూపొందిస్తున్నారు. ఇందులో నాగార్జున సరసన సోనాల్ చౌహాన్ హీరోయిన్ గా నటిస్తోంది. గుల్ పనాగ్ మరియు అనిఖా సురేంద్రన్ ఇతర ముఖ్య పాత్రలు పోషిస్తున్నారు.

నారాయణ్ దాస్ నారంగ్ ఆశీస్సులతో సోనాలి నారంగ్ సమర్పణలో శ్రీ వెంకటేశ్వర సినిమాస్ ఎల్ఎల్పి మరియు నార్త్ స్టార్ ఎంటర్టైన్మెంట్ ప్రై.లి బ్యానర్స్ పై పుష్కర్ రామ్మోహనరావు - శరత్ మరార్ సంయుక్తంగా ఈ చిత్రాన్ని నిర్మిస్తున్నారు.

ముఖేష్ జీ సినిమాటోగ్రఫీ అందిస్తుండగా.. బ్రహ్మ కడలి ఆర్ట్ డైరెక్టర్ గా వర్క్ చేస్తున్నారు. దినేష్ సుబ్బరాయన్ మరియు కిచ్చా స్టంట్ డైరెక్టర్లుగా వ్యవహరిస్తున్నారు. ఒక యాక్షన్ సీక్వెన్స్ షూటింగ్ మినహా దాదాపు ఈ సినిమా పూర్తి కావచ్చింది. త్వరలోనే దీన్ని చిత్రీకరించి.. శరవేగంగా పోస్ట్ ప్రొడక్షన్ వర్క్స్ పూర్తి చేయనున్నారు.