టీజర్ టాక్ః గూఢచారి 116 వచ్చేశాడు

అసలు 116 అనే నెంబర్ ను మనోళ్ళు జేమ్స్ బాండ్ 007 కు డూప్లికేట్ గా కనిపెట్టారు. కాని సూపర్ స్టార్ కృష్ణ మాత్రం.. ఆ పాత్రలో బాగా ఇంప్రెస్ చేసి ఇండియన్ జేమ్స్ బాండ్ గా అలరించారనే చెప్పాలి. ఇప్పుడు అదే నెంబర్ తో.. త్రినేత్ర 116 అంటూ వచ్చేస్తున్నాడు అడివి శేష్‌. మనోడు చాన్నాళ్ళనుండి తీస్తున్న ''గూఢచారి'' సినిమా తాలూకు టీజర్ ఇప్పుడు చూపించేశాడు.

కొత్త దర్శకుడు శశికిరణ్‌ దర్శకత్వంలో.. అడివి శేష్‌ రాసిన ఒక కథ ఇప్పుడు గూఢచారిగా తెరమీదకు వచ్చేసింది. ఈ సినిమాలో తన తండ్రి మన దేశపు గూఢచారి సంస్త 'రా'లో పనిచేసినందుకు.. కొడుకు కూడా అదే పనికి వెళ్ళే యువకుడిగా కనిపిస్తాడు. అక్కడి నుండి సదరు ఏజెంట్ ఎక్కడెక్కడికి వెళ్ళాడు.. ఏం చాలెంజులు ఫేస్ చేశాడు అనేదే సినిమా. షానిల్ డియో సినిమాటోగ్రాఫి.. శ్రీచరణ్‌ పాకాల సంగీతం.. సినిమాను హాలీవుడ్ స్ఠాయిలో చూపిస్తున్నాయి. అయితే కథ ఎంత కొత్తగా ఉంటుందనేది కూడా ఇక్కడ మఖ్యమే. ఇకపోతే సినిమా చాలా స్టయిలిష్‌ గా ఉండటంలో.. విజువల్ ఎఫెక్ట్స్ సాయం కూడా గట్టిగా ఉన్నట్లే కనిపిస్తోంది.

నిజానికి ఈ టీజర్లో అందరినీ ఆకట్టుకుంది ఎవ్వరూ అంటే.. 20 ఏళ్ళ తరువాత తిరిగి ముఖానికి రంగేసుకున్న అక్కడమ్మాయ్ ఇక్కడబ్బాయ్ హీరోయిన్ సుప్రియ యార్లగడ్డ. నటుడు నాగార్జున అక్క కూతురు అయిన ఈమె.. ఆ సినిమా తరువాత తిరిగి నటనలో అవకాశాలనే వెతుక్కోలేదు. ఇక మరో తెలుగమ్మాయ్.. మిస్సిండియా.. శోభిత ధూళిపాళ.. తన తొలి తెలుగు సినిమాలోనే లిప్ కిస్ తో ఎంట్రీ ఇచ్చింది. అది సంగతి.