పంతం నెరవేరి తీరాలి

గోపిచంద్ లాంటి మల్టీ టాలెంటెడ్ హీరో ఇంత బ్యాడ్ పీరియడ్ లో ఉండటం ఫాన్స్ కి మింగుడు పడటం లేదు. ఒకే తరహా సినిమాలకు కట్టుబడకుండా మంచి కథలతో వరస సక్సెస్ లు చూసిన తమ హీరో మూసలో పడిపోయి డిజాస్టర్లు అందుకుంటూ ఉంటే ఎవరికైనా బాధ ఉంటుంది. అందుకే జులై 5న రాబోతున్న తన 25వ సినిమా పంతం మీద చాలా నమ్మకం పెట్టుకున్నాడు గోపీచంద్. ట్రైలర్ కాస్త రొటీన్ గా ఉండటంతో పాటు రెగ్యులర్ సబ్జెక్టుకే కాస్త మెసేజ్ కోటింగ్ ఇచ్చిన ఫీలింగ్ కలిగింది. దీంతో అంచనాలు పెరిగేందుకు అవకాశం దొరకలేదు.

అసలే థియేట్రికల్ బిజినెస్ ఆశించిన స్థాయిలో జరగక నిర్మాతలు విడుదల అయ్యాక వచ్చే రెస్పాన్స్ మీదే ఆశలన్నీ పెట్టుకున్నారు. గోపి కూడా ఇది సక్సెస్ అయితేనే తన కెరీర్ పుంజుకుంటుంది అనే విషయాన్నీ స్వయంగా ఒప్పుకున్నాడు. ఈ నేపథ్యంలో ఓపెనింగ్స్ చాలా కీలకంగా మారడంతో పాటు మొదటి రోజు వచ్చే టాక్ పంతం ఫేట్ ని డిసైడ్ చేయనుంది. ఇప్పటికే డౌన్ అయిన మార్కెట్ లో మళ్ళి తానేంటో ఋజువు చేసుకోవాల్సిన అవసరం వచ్చింది గోపిచంద్ కు. పైగా కొత్త దర్శకుడు చక్రవర్తి ఎలా డీల్ చేసుంటాడా అనే సంశయం కూడా అభిమానుల్లోలేకపోలేదు. ఇక హీరోయిన్ మెహ్రీన్ కూడా దీని ఫలితం గురించి ఎదురు చూస్తోంది. గత ఏడాది రాజా ది గ్రేట్ మహానుభావుడు వరస హిట్స్ వచ్చాయి అనుకుంటే ఆ వెంటనే కేరాఫ్ సూర్య-జవాన్ పెద్ద షాక్ ఇచ్చాయి. పంతంతో సాలిడ్ గా ఒక హిట్ పడితే వచ్చే అవకాశాలు ఇంకాస్త స్పీడందుకుంటాయని తన ఆశ.

పంతం లైన్ చూస్తుంటే జిల్ కాన్సెప్ట్ కు కాస్త మాస్ టచ్ ఇచ్చి శంకర్ జెంటిల్ మెన్ తరహాలో మెసేజ్ మిక్స్ చేసినట్టు కనిపిస్తోంది. రొటీన్ కథలతో తన ఉనికిని ప్రశ్నార్థకం చేసుకున్న గోపీచంద్ మళ్ళి అదే రూట్ లో వెళ్లాడా లేక ట్రాక్ మార్చి కొత్తగా ఏదైనా ప్రయత్నించాడా అనేది విడుదల అయ్యాక చూడాలి. ఫలితం పాజిటివ్ అయితే ఓకే. తేడా వస్తే అంతే సంగతులు. అందుకే గోపీచంద్ ఇంత టెన్షన్ పడడానికి కారణం.