భయపడ్డ బుల్లెట్ వెనక్కు వెళ్లాడు

గోపీచంద్ హీరోగా బి. గోపాల్ దర్శకత్వంలో రూపొందిన చిత్రం ఆరడుగుల బుల్లెట్. కొన్నేళ్ల క్రితమే షూటింగ్ ప్రారంభించుకున్న ఈ చిత్రం.. ఎట్టకేలకు అన్నీ పూర్తి చేసుకుని రిలీజ్ కి సిద్ధమైంది. మే 19న అంటే ఇవాళ రిలీజ్ డేట్ కూడా ఇచ్చేశారు. కానీ సడెన్ గా ఈ మూవీ విడుదల వాయిదా వేస్తున్నట్లు ప్రకటించారు మేకర్స్.

గోపీచంద్ - నయనతార జంటగా నటించిన ఆరడుగులు బుల్లెట్ ను యాక్షన్ జోనర్ లో తెరకెక్కించారు. బి గోపాల్ మార్క్ యాక్షన్.. గోపీచంద్ స్టైల్ యాక్టింగ్.. నయనతార అందాలు ఈ మూవీకి అట్రాక్షన్స్ గా చెబుతున్నా.. థియేటర్లలోకి వచ్చేందుకు ఇబ్బందులు ఎదురవుతున్నాయి. అన్నిటినీ అధిగమించి ఇప్పుడు విడుదల చేద్దామంటే.. థియేటర్ల కొరత ఎదురవుతోంది. బాహుబలి2 విడుదల అయ్యి మూడు వారాలు పూర్తయి పోయి నాలుగోవారంలోకి ఎంటర్ అయినా.. ఇంకా కలెక్షన్స్ లో జోరు చూపిస్తూనే ఉంది.. వసూళ్లలో టాప్ ప్లేస్ లోనే ఉంది.

ఇవాళ నిఖిల్ నటించిన కేశవ చిత్రంపై అంచనాలు ఎక్కువగా ఉండడంతో భారీగా థియేటర్లు కేటాయించారు. శర్వానంద్ రాధకు డివైడ్ టాక్ ఉన్నా.. చెప్పుకోదగిన సంఖ్యలో స్క్రీన్లను నిలబెట్టుకోవడం విశేషం. హ్యాపీడేస్ ఫేమ్ రాహుల్ నటించిన వెంకటాపురం మిగిలిన థియేటర్లలో ఆడుతోంది. దీంతో ఆరడుగుల బుల్లెట్ కు అనుకున్న స్థాయిలో స్క్రీన్స్ దక్కలేదు. ఈ పరిస్థితి మరో రెండు వారాలు కొనసాగే ఛాన్స్ ఉండడంతో.. ఆరడుగుల బుల్లెట్ ను జూన్ కు వాయిదా వేసినట్లు తెలిపారు మేకర్స్.

Like Us on Facebook : https://www.facebook.com/Tupakidotcom/