గోపీచంద్ వ‌ర్సెస్ నాని

ఇదివ‌ర‌కు సంక్రాంతి - ద‌స‌రా - వేస‌వి స‌మ‌యాల్లో మాత్ర‌మే బాక్సాఫీసు ద‌గ్గ‌ర పోటీ ఉండేది. మిగ‌తా స‌మ‌యాల్లో నువ్వొక శుక్ర‌వారం - నేనొక శుక్ర‌వారం అనుకొంటూ ఒక‌రి వెంట మ‌రొక‌రు సినిమాల్ని విడుద‌ల చేసుకొనేవాళ్లు. కానీ ఇప్పుడు రెండు రోజులు సెల‌వులొచ్చినా స‌రే వాటికోసం పోటీప‌డుతున్నారు. ఆ రెండు రోజుల్ని ఎలాగైనా క్యాష్ చేసుకోవాల‌ని ఎవ‌రికి వారు త‌మ సినిమాల్ని విడుద‌ల చేసుకొనేందుకు ప్ర‌య‌త్నాలు చేస్తుండ‌డ‌టంతో బాక్సాఫీసు ద‌గ్గ‌ర పోటీ వాతావ‌ర‌ణం స్ప‌ష్టంగా క‌నిపిస్తోంది. ఇదివ‌ర‌క‌టిలా ఇప్పుడు లాంగ్ ర‌న్ సంస్కృతి క‌నిపించ‌డం లేదు. ఎంత బాగున్న సినిమా అయినా రెండు వారాల‌కి మించి ఆడే ప‌రిస్థితి లేదు. వ‌సూళ్లకి మాత్రం తొలి రెండు రోజులు కీల‌క‌మ‌వుతున్నాయి. అందుకే ఆ రెండు రోజులు సెల‌వు రోజులు ఉంటే బాగుంటుంద‌ని భావిస్తున్నారు. దస‌రా, దీపావ‌ళి పూర్త‌యింది కాబ‌ట్టి ఇప్పుడు అంద‌రి చూపూ క్రిస్‌మ‌స్‌ - సంక్రాంతిపై ప‌డింది. సంక్రాంతికి బాల‌కృష్ణ‌ - ఎన్టీఆర్‌ - నాగార్జున‌లాంటి బడా హీరోలు పోటీప‌డుతున్నారు. అందుకే క్రిస్‌ మ‌స్‌ కోసం మిగ‌తా హీరోలు పోటీప‌డుతున్నారు.
ఈసారి క్రిస్‌ మ‌స్‌ కి గోపీచంద్‌ - నానిల మ‌ధ్య పోటీ ఉండ‌బోతోంది.

గోపీచంద్ క‌థానాయ‌కుడిగా న‌టిస్తున్ సౌఖ్యం సినిమాని క్రిస్‌ మ‌స్‌ కి విడుద‌ల చేసేందుకు ప్ర‌ణాళిక‌లు రూపొందించారు. ఇప్ప‌టికే టాకీ భాగంతోపాటు మూడు పాట‌ల్ని పూర్తి చేసుకొన్న ఆ సినిమా క్రిస్‌ మ‌స్‌ కోసం ప‌క్కాగా ముస్తాబ‌వుతోంది. ఎ.ఎస్‌.ర‌వికుమార్ చౌద‌రి ద‌ర్శ‌క‌త్వంలో తెర‌కెక్కుతున్న చిత్ర‌మది. గోపీ స‌ర‌స‌న రెజీనా న‌టించింది. నాని క‌థానాయ‌కుడిగా 14 రీల్స్ సంస్థ ఓ చిత్రాన్ని నిర్మిస్తోంది. హ‌ను రాఘ‌వ‌పూడి ద‌ర్శ‌క‌త్వం వ‌హిస్తున్న ఆ సినిమాకి మ‌రో వారం రోజుల్లో టైటిల్‌ ని ఫిక్స్ చేస్తారు. చిత్రీక‌ర‌ణ దాదాపుగా పూర్తి చేసుకొన్న ఆ సినిమా కూడా క్రిస్‌ మ‌స్‌ కి రావ‌డం ఖాయ‌మ‌ట‌. వీరిద్ద‌రితో పాటు మ‌రికొద్దిమంది క‌థానాయ‌కులు కూడా బ‌రిలోకి దిగాల‌ని ప్లాన్ చేసుకొన్నారు. సో... ఈసారి సంక్రాంతి సంద‌డి బాక్సాఫీసును ముందే తాకేలా ఉంది.