ఔను.. ఆగిపోయిన ఆ సినిమా వస్తోంది

గోపీచంద్ కొన్నేళ్ల కిందట సీనియర్ దర్శకుడు తమిళ దర్శకుడు భూపతి పాండ్యన్ తో ‘జగన్మోహన్ ఐపీఎస్’ అనే సినిమా మొదలుపెట్టిన సంగతి గుర్తుండే ఉంటుంది. కారణమేంటో కానీ.. సినిమా మధ్యలో ఉండగా ఆ దర్శకుడిని తప్పించి సీనియర్ దర్శకుడు బి.గోపాల్ కు దర్శకత్వ బాధ్యతలు అప్పగించారు. అయినా ప్రాజెక్టు ముందుకు కదల్లేదు. కొన్నాళ్లు షూటింగ్ జరిపాక ఆగిపోయింది. మళ్లీ ఓ సందర్భంలో సినిమాను పున:ప్రారంభించారు. కానీ మళ్లీ బ్రేక్ పడింది.

చివరికి ఆ సినిమాను పక్కనబెట్టేసి వేరే ప్రాజెక్టుల్లో బిజీ అయ్యాడు గోపీ. ఇక ఆ సినిమా ఎప్పటికీ విడుదలకు నోచుకోదనే అనుకున్నారు. కానీ గత కొన్ని రోజుల నుంచి ఈ సినిమాను ప్రేక్షకుల ముందుకు తేవడానికి ప్రయత్నాలు జరుగుతున్నట్లు వార్తలొస్తున్నాయి. ఈ సినిమాకు ‘బలం’ అని గోపీచంద్ సెంటిమెంటు ప్రకారం టైటిల్ కూడా మార్చినట్లు మాట్లాడుకున్నారు. ఐతే దీని గురించి అఫీషియల్ న్యూస్ మాత్రం ఏదీ బయటికి రాలేదు.

ఐతే ఎట్టకేలకు ఈ చిత్ర నిర్మాతే ఈ సినిమాను బయటికి తెస్తున్నట్లు వెల్లడించాడు. జయ బాలాజీ రియల్ మీడియా బేనర్ మీద తాండ్ర రమేష్ ఈ చిత్రాన్ని నిర్మిస్తున్నాడు. ఆయన మాట్లాడుతూ దీపావళికి ఈ చిత్రం ఫస్ట్ లుక్ పోస్టర్ రిలీజ్ చేయబోతున్నట్లు చెప్పాడు. నవంబర్లో ఆడియోను విడుదల చేసి.. డిసెంబర్లో చిత్రాన్ని ప్రేక్షకుల ముందుకు తెస్తామన్నాడు. క్లైమాక్స్ మినహా సినిమా అంతా పూర్తయిందని.. త్వరలోనే మిగతా పని పూర్తి చేస్తామని రమేష్ వెల్లడించాడు. మరోవైపు గోపీ కొత్త సినిమా ‘ఆక్సిజన్’ నవంబర్లోనే ప్రేక్షకుల ముందుకు రానుంది. కాబట్టి రాబోయే రెండు నెలల్లో రెండు సినిమాలతో పలకరిస్తాడన్నమాట గోపీచంద్.

Like Us on Facebook : https://www.facebook.com/Tupakidotcom/