పంతం గట్టిగా పడితే కొట్టినట్లే

చాలాకాలం నుండి కమర్షియల్ సినిమాల విషయంలో యాక్షన్ హీరో గోపిచంద్ అంచనాలు తప్పుతున్నాయి కాని.. ఇప్పుడు మాత్రం కాస్త గట్టిగానే 'పంతం' పడుతున్నట్లు కనిపిస్తోంది. ఇప్పటికే కమర్షియల్ సినిమాలో మెసేజ్ చెబుతూ ట్రైలర్ ద్వారా ఇంప్రెస్ చేశాడు మన హీరో. అలాగే కొత్త దర్శకుడు చక్రవర్తి కూడా చాలా కాన్ఫిడెంట్ గా ఉన్నాడు. ఇకపోతే ఇప్పుడు మరో విషయం గురించి చెప్పుకోవాలి.

నిజానికి రంగస్థలం..భరత్ అను నేను.. మహానటి సినిమాల తరువాత.. అసలు టాలీవుడ్ లో ఈ సమ్మర్ సీజన్ తరువాత.. ఒక్కటంటే ఒక్క పెద్ద హిట్ కూడా పడలేదు. బాగా కొడతాయి అనుకున్న సినిమాలు కూడా తేలిపోయాయ్. ఇప్పుడు బాక్సాఫీస్ దగ్గర సరిగ్గా ఆడుతున్న సినిమా లేక ధియేటర్లు కూడా విలవిలబోతున్నాయి. ఇక క్లాస్ సినిమాలు కాసినన్ని ఎక్కువగా వచ్చాయి కాని.. మాస్ సినిమాలు మాత్రం రానే రావట్లేదు. ఈ సమయంలో సోషల్ మెసేజ్ ను బేస్ చేసుకుని ఒక భారతీయుడు తరహా కథనంతో గోపిచంద్ 'పంతం' అంటూ వస్తున్నాడు. అందుకే ఈ శుక్రవారం రిలీజవ్వబోయే సదరు సినిమాపై అంచనాలు బాగా పెరిగిపోయాయ్.

పైగా గోపిచంద్ కూడా ఈ సినిమా చాలా బాగా వచ్చింది.. హిట్ చేయండి..అంటూ ఎమోషనల్ గా చెప్పడంతో.. అది కూడా జనాలకు విపరీతంగా కనక్ట్ అయ్యింది. ఈ సమయంలో 'పంతం' ఏమాత్రం కాస్త అలరించినా కూడా.. బ్లాక్ బస్టర్ హిట్ట ఖాయం. లెటజ్ సీ.