గోపీచంద్ డబుల్ వేస్తున్నాడుగా

గోపీచంద్ తో సంపత్ నంది సినిమా ఫైనల్ అయిన విషయం తెలిసిందే. సాధారణంగా మాస్ సినిమాలకు సంపత్ నంది మార్క్ టచ్ అద్ది.. ఈ దర్శకుడు తెరకెక్కిస్తూ ఉంటాడు. మొదటి సినిమా ఏమైంది ఈ వేళను మినహాయిస్తే.. మెగాపవర్ స్టార్ రామ్ చరణ్ తో చేసిన రచ్చ అయినా.. ఆ తర్వాత మాస్ మహరాజ్ తో చేసిన బెంగాల్ టైగర్ అయినా.. మాస్ కంటెంట్ బేస్డ్ గా సాగుతాయి.

ఇప్పుడు గోపీచంద్ తో చేయనున్న మూవీలో కూడా కమర్షియల్ ఎలిమెంట్స్ ఫుల్లుగా ఉంటాయని తెలుస్తోంది. ఈ సినిమాలో గోపీచంద్ డ్యుయల్ రోల్ చేయనున్నాడనే న్యూస్ మాత్రం ఇప్పుడు హాట్ టాపిక్ అవుతోంది. 'డ్యుయల్ రోల్ బేస్డ్ గా సంపత్ నంది చెప్పిన స్టోరీ గోపీచంద్ కు విపరీతంగా నచ్చేసింది. ఇది కంప్లీట్ గా కమర్షియల్ ఎంటర్టెయినర్. గతంలో సంపత్ నంది తీసిన సినిమాల మాదిరిగానే.. పూర్తి ఎంటర్టెయిన్మెంట్ ఆధారంగానే సాగుతుంది' అని సన్నిహితులు చెబుతున్నారు.

ఈ మూవీలో ఇద్దరు హీరోయిన్స్ కి ఛాన్స్ ఉండగా.. ఇంకా ఒకరిని కూడా ఫైనల్ చేయలేదు. ఆగస్ట్ లో ఈసినిమా షూటింగ్ ప్రారంభించేందుకు షెడ్యూల్స్ ప్లాన్ చేస్తున్నారు. గోపీచంద్ ప్రస్తుతం ఆక్సిజన్ మూవీ చేస్తుండగా.. అది పూర్తి కాగానే సంపత్ నంది సినిమాకి జాయిన్ కానున్నాడు.