'జై బాలయ్య' అంటున్న క్రాక్ దర్శకుడు..?

నటసింహం నందమూరి బాలకృష్ణ 'అఖండ' సినిమా తర్వాత గోపీచంద్ మలినేని దర్శకత్వంలో ఓ సినిమా చేయనున్న సంగతి తెలిసిందే. ప్రస్తుతం ప్రీ ప్రొడక్షన్ వర్క్స్ జరుపుకుంటున్న #NBK107 చిత్రాన్ని నవంబర్ నుంచి సెట్స్ మీదకు తీసుకెళ్లాలని చూస్తున్నారు. అయితే అంతలోపే ఈ క్రేజీ ప్రాజెక్ట్ కు సంబంధించిన టైటిల్స్ గురించి సోషల్ మీడియాలో అనేక వార్తలు వస్తున్నాయి.

బాలకృష్ణ ను అభిమానులు ముద్దుగా పిలుచుకునే.. నినదించే ''జై బాలయ్య'' అనే పేరునే సినిమా టైటిల్ గా పెట్టాలని గోపీచంద్ మలినేని ఆలోచిస్తున్నారట. అందుకే ప్రస్తుతానికి అదే టైటిల్ ను రిజిస్టర్ చేయించి పెట్టారట. సినిమా స్టార్ట్ అయ్యే సమయానికి మరో మంచి టైటిల్ దొరకపోతే.. జై బాలయ్య టైటిల్ నే ఖరారు చేయాలని మేకర్స్ భావిస్తున్నారట.

ఒకవేళ అదే సినిమా పేరుగా పెడితే నందమూరి ఫ్యాన్స్ మరింత ఖుషీ అయ్యే అవకాశం ఉంది. ఎందుకంటే 'జై బాలయ్య' అనే పదాన్ని వారు తమ అభిమాన హీరో మీదున్న ప్రేమను చాటుకోడానికి పిలుచుకుంటారు. సినిమా ఫంక్షన్స్ మొదలుకొని క్రికెట్ స్టేడియంలలో కూడా జై బాలయ్య నినాదం వినిపిస్తూ ఉంటుంది. మరి దాన్నే టైటిల్ గా పెడతారా లేదా అనేది తెలియాలంటే ఇంకొన్నాళ్లు ఆగాల్సిందే.

ఇకపోతే ఈ మధ్య #NBK107 చిత్రానికి 'రౌడీయిజం' అనే టైటిల్ ను పెడుతున్నట్లు రూమర్స్ వచ్చాయి. వీటిని ఖండిస్తూ చిత్ర నిర్మాతలు ఓ ప్రకటన రిలీజ్ చేశారు. బాలకృష్ణ 107వ సినిమా టైటిల్ ను సరైన సమయం వచ్చినప్పుడు అధికారికంగా ప్రకటిస్తామని.. అప్పటి వరకు ఎలాంటి ఊహాగానాలను నమ్మవద్దని పేర్కొన్నారు. ఈ చిత్రానికి సరిపోయే టైటిల్ ను మరియు సినిమాకు సంబంధించిన ఇతర వివరాలను సరైన సమయం వచ్చినప్పుడు వెల్లడిస్తామని తెలిపారు. ఇప్పుడు మరోసారి ఈ క్రీజీ మూవీ సినిమా టైటిల్ 'జై బాలయ్య' అంటూ ప్రచారం జరుగుతోంది.

కాగా, వాస్తవ సంఘటన ఆధారంగా రాయలసీమ బ్యాక్ డ్రాప్ లో రాసుకున్న ఓ పవర్ ఫుల్ స్టోరీతో #NBK107 తెరకెక్కనుంది. మైత్రీ మూవీ మేకర్స్ బ్యానర్ పై నవీన్ ఎర్నేని - వై.రవిశంకర్ ఈ చిత్రాన్ని నిర్మించనున్నారు. వరలక్ష్మీ శరత్ కుమార్ ఈ సినిమాలో కీలక పాత్ర పోషించనుంది. థమన్ సంగీతం సమకూర్చానున్నారు. 'క్రాక్' వంటి బ్లాక్ బస్టర్ తర్వాత గోపీచంద్ మలినేని.. బాలయ్య తో చేస్తున్న ఈ ప్రాజెక్ట్ మీద మంచి అంచనాలున్నాయి. నటసింహాన్ని ఎలాంటి అవతారంలో చేయబోతున్నారో అని ఫ్యాన్స్ ఆసక్తిగా ఎదురుచూస్తున్నారు.