మురుగ క‌థ‌..గోపి డైరెక్ష‌న్‌..రాజు నిర్మాణం

తెలుగులో మ‌రో ఆస‌క్తిక‌ర‌మైన కాంబినేష‌న్‌కి తెర లేసింది. స్టార్ డైరెక్ట‌ర్ మురుగ‌దాస్ క‌థ‌తో గోపీచంద్ మ‌లినేని ద‌ర్శ‌కుడిగా దిల్‌ రాజు ఓ చిత్రాన్ని నిర్మించ‌బోతున్నాడు. ప్ర‌స్తుతం ఆ ప్రాజెక్టుపై య‌మా సీరియ‌స్‌ గా డిస్క‌ష‌న్లు జ‌రుగుతున్నాయి. అందులో హీరో ఎవ‌రనేది తెలియ‌డం లేదు కానీ... ఈ కాంబినేష‌న్‌ నిబ‌ట్టి చూస్తుంటే తెలుగు, త‌మిళ‌భాష‌ల్లో మార్కెట్ ఉన్న ఓ స్టార్ హీరోనే న‌టించొచ్చ‌ని స‌మాచారం అందుతోంది.

ఇంత‌కీ ఈ ఆస‌క్తిక‌ర‌మైన కాంబినేష‌న్ ఎలా సెట్ట‌య్యిందంటే... మురుగ‌దాస్ తెలుగులో తీసిన `స్టాలిన్‌` సినిమాకి గోపీచంద్ మ‌లినేని అసిస్టెంట్‌ గా ప‌నిచేశాడు. అప్ప‌ట్లో గోపి ప‌నితీరు మురుగ‌కి బాగా న‌చ్చింది. అప్పట్నుంచి ఇద్ద‌రూ సొంత అన్న‌దమ్ముల్లా మెలుగుతున్నారు. గోపీచంద్ మ‌లినేనిని తానే ద‌ర్శ‌కుడిగా ప‌రిచ‌యం చేద్దామ‌నుకొన్నాడట మురుగ‌దాస్‌. ఇంత‌లో ఆయ‌నే ర‌వితేజ‌తో `డాన్ శీను` చేసి ఇంట్ర‌డ్యూస్ అయ్యాడు. మంచి ద‌ర్శ‌కుడిగా పేరు తెచ్చుకొన్నాడు. స‌క్సెస్ ఫెయిల్యూర్స్‌ ని ప‌క్క‌న‌పెడితే భారీ సినిమాల్నే చేస్తున్నాడు. రీసెంట్‌ గా పండ‌గ చేస్కో సినిమా చేసిన గోపీతో ఇప్పుడు మురుగ‌దాస్ ఓ సినిమా చేయాల‌ని డిసైడ్ అయిపోయాడ‌ట‌. ఆ సినిమాకి క‌థ‌ని కూడా తానే అందిస్తున్నాడ‌ట‌. అయితే గోపీ ఈ ప్రాజెక్టులోకి దిల్‌ రాజుని కూడా ఎంట‌ర్ చేయించాల‌ని డిసైడ్ అయ్యాడ‌ట‌.

మురుగదాస్‌ లాంటి స్టార్ డైరెక్ట‌ర్ క‌థ కాబ‌ట్టి దిల్‌ రాజు కూడా సినిమాని నిర్మించేందుకు ముందుకొచ్చిన‌ట్టు తెలుస్తోంది. అయితే ఈ సినిమాకి మురుగ కూడా ఓ నిర్మాత‌గా వ్య‌వ‌హ‌రిస్తాడ‌ని, తెలుగుతోపాటు త‌మిళంలోనూ ఒకేసారి తెర‌కెక్కించి రెండు చోట్లా విడుద‌ల చేసే ప్ర‌య‌త్నాల్లో ఉన్నార‌ని తెలుస్తోంది. విశ్వ‌స‌నీయ స‌మాచారం మేర‌కు ఈ సినిమాలో ఎన్టీఆర్ న‌టించొచ్చ‌ని ప్ర‌చారం సాగుతోంది. క‌థ గురించి డిస్క‌ష‌న్లు పూర్త‌వ్వ‌గానే ఇత‌ర వివ‌రాల్ని ప్ర‌క‌టించే అవ‌కాశ‌ముంది. ఇటీవ‌ల స్టోరీ డిస్క‌ష‌న్ స‌మ‌యంలో దిల్‌ రాజు - మురుగ‌ - గోపి క‌లిసి తీయించుకొన్న ఫొటోనే ఇది.