మాచో స్టార్.. కొత్త సినిమా షురూ

యాక్షన్ హీరో గోపీచంద్ కు ఈమధ్య సాలిడ్ హిట్ అయితే దక్కలేదు కానీ తన సినిమాల బాక్స్ ఆఫీస్ ఫలితాలతో సంబంధం లేకుండా సినిమాలు చేస్తూ ఉన్నాడు. ఇప్పటికే గోపీచంద్ రెండు ప్రాజెక్టులు లైన్లో ఉన్న సంగతి తెలిసిందే. వాటిలో 'చాణక్య' దసరాకు ప్రేక్షకుల ముందుకు రానుంది. ఇక తాజాగా గోపిచంద్ నటిస్తున్న మరో సినిమా షూటింగ్ కూడా ప్రారంభం అయింది.

బిను సుబ్రహ్మణ్యం అనే నూతన దర్శకుడు ఈ సినిమాతో టాలీవుడ్ కు పరిచయం అవుతున్నాడు. ఈ సినిమా సీనియర్ నిర్మాత బీవీఎస్ఎన్ ప్రసాద్ శ్రీ వెంకటేశ్వర సినీ చిత్ర బ్యానర్ పై నిర్మిస్తున్నారు. ఈ సినిమాకు మణిశర్మ సంగీతం అందిస్తారు. సతీష్ కురుప్ ఈ చిత్రానికి సినిమాటోగ్రాఫర్. యాక్షన్ అడ్వెంచర్ ఎంటర్టైనర్ గా ఈ సినిమా అన్ని వర్గాల ప్రేక్షకులు మెచ్చేలా ఉంటుందని నిర్మాత బీవీఎస్ఎస్ ప్రసాద్ అంటున్నారు. ఈ సినిమాకు సంబంధించిన మెజారిటీ షూటింగ్ ను నేపాల్.. థాయ్ ల్యాండ్.. కంబోడియాలోని అద్భుతమైన లోకేషన్లలో జరుపుతారని ఆయన వెల్లడించారు.

బీవీఎస్ఎన్ ప్రసాద్ బ్యానర్ లో గోపీచంద్ నటించడం ఇది రెండోసారి. గతంలో వీరిద్దరి కాంబినేషన్లో 'సాహసం' అనే చిత్రం తెరకెక్కింది. చంద్రశేఖర్ యేలేటి దర్శకత్వంలో తెరకెక్కిన ఆ చిత్రానికి విమర్శకుల ప్రశంసలు దక్కాయి. ఇప్పుడు వెంకటేశ్వర సినీ చిత్ర బ్యానర్ లో కొత్త దర్శకుడితో తెరకెక్కుతున్న ఈ సినిమా గోపీచంద్ కు మంచి సక్సెస్ ఇస్తుందేమో వేచి చూడాలి. ఈ సినిమాకు సంబంధించిన ఇతర వివరాలు త్వరలోనే వెల్లడిస్తారట