కాస్త గ్యాప్‌ ఇచ్చి మొదలు పెట్టాడు

హీరో గోపీచంద్‌ వరుస చిత్రాలు ఫ్లాప్‌ అవ్వడంతో కాస్త గ్యాప్‌ తీసుకున్నాడు. చాలా నమ్మకం పెట్టుకుని చేసిన సినిమాలు నిరుత్సాహ పర్చడంతో గోపీచంద్‌ ఆలోచనలో పడ్డాడు. కథల విషయంలో కొత్తదనం కోసం ఎన్నో కథలు విన్నాడు. ఎట్టకేలకు గోపీచంద్‌ ఒక సినిమాకు కమిట్‌ అయ్యాడు. తాజాగా ఆ సినిమాకు సంబంధించిన చిత్రీకరణ కూడా ప్రారంభం అయ్యింది. విభిన్నమైన కథతో ఈ చిత్రం రూపొందుతున్నట్లుగా చిత్ర యూనిట్‌ సభ్యులు చెబుతున్నారు.

తమిళ దర్శకుడు తిరు దర్శకత్వంలో ఈ చిత్రం తెరకెక్కబోతుంది. స్క్రిప్ట్‌ వర్క్‌ ఇప్పటికే పూర్తి చేసిన దర్శకుడు నటీనటుల ఎంపికలో ఉన్నట్లుగా తెలుస్తోంది. పూజా కార్యక్రమాలు లాంచనంగా నిర్వహించిన ఈ సినిమా రెగ్యులర్‌ షూటింగ్‌ ను వచ్చే నెలలో ప్రారంభించబోతున్నారట. అనీల్‌ సుంకర ఈ చిత్రంను నిర్మిస్తున్నాడు. విభిన్న చిత్రాల నిర్మాతగా పేరు దక్కించుకున్న అనీల్‌ సుంకరకు కథ బాగా నచ్చడంతో ఈ ప్రాజెక్ట్‌ ను నిర్మించేందుకు ముందుకు వచ్చాడట.

స్పయ్‌ థ్రిల్లర్‌ గా ఈ చిత్రం ఉంటుందని, తప్పకుండా ఈ చిత్రం ప్రేక్షకులకు కొత్త అనుభూతిని కలిగిస్తుందంటున్నారు. రెగ్యులర్‌ కమర్షియల్‌ చిత్రంలా కాకుండా డిఫరెంట్‌ థ్రిల్లర్‌ గా ఈ చిత్రం ఉంటుందని దర్శకుడు తిరు చెబుతున్నాడు. వచ్చే వేసవి తర్వాత సినిమాను విడుదల చేసేలా ప్లాన్‌ చేస్తున్నారట.