గోపీచంద్ లైన్లోకి వచ్చేశాడు

‘లౌక్యం’ సినిమాతో కెరీర్లో అతి పెద్ద హిట్ కొట్టిన గోపీచంద్.. ‘సౌఖ్యం’ సినిమాతో దబేల్మని కింద పడ్డాడు. ఇప్పుడతడి ఆశలన్నీ ‘ఆక్సిజన్’ మీదే ఉన్నాయి. ఎ.ఎం.రత్నం తనయుడు జ్యోతికృష్ణ ‘నీ మనసు నాకు తెలుసు’ తర్వాత తన దర్శకత్వంలో తెరకెక్కిస్తున్న రెండో సినిమా ఇది. రత్నమే నిర్మాత. ఆ మధ్య రిలీజైన ‘ఆక్సిజన్’ ఫస్ట్ లుక్ పోస్టర్లు పర్వాలేదనిపించాయి. గోపీచంద్ ఎనర్జిటిగ్గా కనిపించాడు ఆ పోస్టర్లలో. గోపీ తనదైన శైలిలో ఓ యాక్షన్ స్టోరీ చేస్తున్నట్లుగా కనిపించింది ఈ పోస్టర్లు చూస్తే. ఇప్పటికే షూటింగ్ పూర్తి చేసుకున్న ఈ చిత్రం విడుదలకు ముస్తాబవుతోంది. సెప్టెంబరు నెలాఖర్లో ‘ఆక్సిజన్’ను ప్రేక్షకుల ముందుకు తేవాలని భావిస్తున్నారు.

ప్రస్తుతం ‘ఆక్సిజన్’ డబ్బింగ్ పనుల్లో ఉంది. సెప్టెంబరు మొదటి వారంలో ఆడియో విడుదల చేయబోతున్నారు. దాని కంటే ముందు ఫస్ట్ లుక్ టీజర్ కూడా వదులుతారు. తమిళ స్టార్ మ్యూజిక్ డైరెక్టర్ యువన్ శంకర్ రాజా ఈ చిత్రానికి సంగీతం అందిస్తున్నాడు. ఇందులో గోపీచంద్ సరసన రాశి ఖన్నాతో పాటు మలయాళ భామ అను ఎమ్మానుయెల్ హీరోయిన్లుగా నటిస్తున్నారు. జగపతిబాబు ఓ కీలకమైన పాత్రలో కనిపిస్తాడు. పేరు చూస్తే ఇదేదో సైన్స్ ఫిక్షన్ సినిమా లాగా కనిపించింది కానీ.. పోస్టర్లు మాత్రం మామూలు మాస్ మసాలా సినిమానే అనే ఇండికేషన్ ఇస్తున్నాయి. మరి జ్యోతికృష్ణ ఎలాంటి సినిమా తీశాడో చూడాలి.