థియేటర్లలోనే గోపీచంద్ 'సీటీమార్'..!

కరోనా నేపథ్యంలో ఏ సినిమా ఎప్పుడు ఏ వేదికపై విడుదల అవుతుందో చెప్పలేని పరిస్థితులు ఏర్పడ్డాయి. సెకండ్ వేవ్ కారణంగా వాయిదా పడిన వాటిలో ఇప్పటికే చాలా సినిమాలు ఓటీటీ ఫ్లాట్ ఫార్మ్స్ లో రిలీజ్ అయ్యాయి. మరికొన్ని స్ట్రీమింగ్ కి రెడీ అవుతున్నారు. కొన్ని సినిమాలు మాత్రం లేట్ అయినా థియేట్రికల్ రిలీజ్ కోసమే ఎదురుచూస్తున్నాయి. అలానే విడుదలపై క్లారిటీ లేని చిత్రాలు కూడా ఉన్నాయి. అలాంటి వాటిలో ''సీటీమార్'' సినిమా కూడా ఉంది.

డైనమిక్ హీరో గోపీచంద్‌ - మిల్కీ బ్యూటీ తమన్నా భాటియా కలిసి నటిస్తున్న స్పోర్ట్స్‌ డ్రామా ''సీటీమార్‌''. కబడ్డీ నేపథ్యంలో డైరెక్టర్ సంపత్‌ నంది ఈ చిత్రాన్ని తెరకెక్కిస్తున్నారు. ఈ చిత్రంలో భూమిక - దిగంగనా సూర్యవంశీ కీలక పాత్రలు పోషించారు. అప్పుడెప్పుడో షూటింగ్ పూర్తి చేసుకున్న ఈ చిత్రాన్ని ఏప్రిల్ 2న విడుదల చేయాలని అనుకున్నారు. కానీ కోవిడ్ పరిస్థితుల కారణంగా పోస్ట్ పోన్ చేశారు. ఈ క్రమంలో గోపీచంద్ మూవీ డైరెక్ట్ ఓటీటీ రిలీజ్ అవుతుందని తెగ ప్రచారం జరిగింది. అయితే ఈ రూమర్స్ కి మేకర్స్ తాజాగా చెక్ పెట్టారు.

''సీటీమార్'' చిత్రాన్ని థియేటర్లలోనే విడుదల చేయనున్నట్లు మేకర్స్ అధికారికంగా ప్రకటించారు. సెప్టెంబర్ నెలలో ప్రేక్షకుల ముందుకు తీసుకొస్తామని వెల్లడించారు. రిలీజ్ డేట్ ని త్వరలోనే అనౌన్స్ చేస్తామని తెలిపారు. ఈ సందర్భంగా వదిలిన పోస్టర్ లో గోపీచంద్ మీసం తిప్పుతూ కనిపిస్తున్నాడు. ఈ చిత్రంలో ఆంధ్రా మహిళల కబడ్డీ జట్టు కోచ్‌ పాత్రలో గోపీచంద్ నటిస్తున్నారు. తెలంగాణ మహిళల కబడ్డీ కోచ్‌ జ్వాలా రెడ్డి పాత్రలో తమన్నా కనిపించనుంది.

ఇప్పటికే విడుదల చేయబడిన ''సీటీమార్'' పోస్టర్స్ - టీజర్ - 'జ్వాలారెడ్డి' సాంగ్ మంచి రెస్పాన్స్ తెచ్చుకున్నాయి. పవన్ కుమార్ సమర్పణలో శ్రీనివాస సిల్వర్ స్క్రీన్ బ్యానర్ పై చిట్టూరి శ్రీనివాసరావు ఈ చిత్రాన్ని నిర్మిస్తున్నారు. మెలోడీ బ్రహ్మ మణిశర్మ సంగీతం సమకూరుస్తున్నారు. సుందర్ రాజన్ సినిమాటోగ్రఫీ అందిస్తున్నారు. ఇందులో రెహమాన్ - రావు రమేష్ - తరుణ్ అరోరా - పోసాని కృష్ణ మురళి తదితరులు ఇతర పాత్రలు పోషించారు.