స్టార్ హీరో కొత్త సినిమా ప్రారంభం..

టాలీవుడ్ టాల్ హీరో గోపీచంద్‌ 29వ సినిమా ఆరంభమైంది. శ్రీ వెంకటేశ్వర సినీ క్రియేషన్స్ పతాకంపై ప్రముఖ నిర్మాత బీవీఎస్‌ ఎన్‌ ప్రసాద్‌ ఈ చిత్రాన్ని నిర్మిస్తున్నారు. బిను సుబ్రమణ్యం ఈ సినిమాతో దర్శకుడిగా తెలుగు తెరకు పరిచయం అవుతున్నాడు. సతీష్‌ కురుప్‌ సినిమాటోగ్రఫీ అందిస్తున్నారు. ఈ చిత్రం రెగ్యులర్‌ షూటింగ్‌ జూన్‌ నుంచి జరగనుందట. యాక్షన్‌ డ్రామాగా దీన్ని తెరకెక్కిస్తున్నట్లు తెలుస్తోంది. ఈ సినిమా ఆరంభోత్సవాన్ని ఇటీవలే హైదరాబాద్‌లో నిర్వహించారు. ఈ కార్యక్రమానికి దర్శక - నిర్మాతలు తదితరులు హాజరయ్యారు. బీవీఎస్‌ ఎన్‌ ప్రసాద్‌-గోపీచంద్‌ కాంబినేషన్‌ లో ఇప్పటికే ‘సాహసం’ సినిమా విడుదలైంది.

టాలీవుడ్ యాక్షన్ హీరోల్లో గోపీచంద్ ఒకరు. ఆయన సినిమాల్లో ఎమోషన్ రొమాన్స్ కామెడీ అన్ని అంశాలు ఉన్నప్పటికీ యాక్షన్ ఎక్కువగా ఉంటాయి. యజ్ఞం - ఆంధ్రుడు - గోలీమార్ - లక్ష్యం - రణం - లౌక్యం చిత్రాల ద్వారా మంచి గుర్తింపు తెచ్చుకున్నాడు. అయితే కొంతకాలంగా గోపీచంద్ సక్సెస్ లేక బాగా వెనకబడిపోయారు. గత కొన్నేళ్ళుగా సూపర్ హిట్ కోసం ఎదురుచూస్తున్నాడు. గడిచిన మూడేళ్లలో వరుసగా ఐదు డిజాస్టర్లను చవిచూశాడు. ‘జిల్’ సినిమా యావరేజ్ గా నిలిచినా తర్వాత వచ్చిన సినిమాలు పరాజయాన్ని చవిచూశాయి.

ప్రస్తుతం ఫ్లాప్స్ తో స‌త‌మ‌వుతున్న సంపత్‌ నంది దర్శకత్వంలో స్పోర్ట్స్‌ బేస్డ్‌ సినిమా ‘సీటీమార్‌’ వస్తోన్న సంగతి తెలిసిందే. ఇంతకముందు వీరి కాంబోలో వచ్చిన 'గౌతమ్ నంద' సినిమా పరాజయాన్ని చవి చూసింది. 'సీటీమార్‌' గోపీచంద్ 28వ సినిమా. 'యూ టర్న్'లాంటి సూపర్ హిట్ సినిమా అందించిన చిట్టూరి శ్రీనివాసరావు నిర్మాతగా వ్యవహరిస్తున్నారు. ఈ సినిమాలో మిల్కీ బ్యూటీ తమన్నా హీరోయిన్ గా నటిస్తున్నారు. కబడ్డీ ఆట నేపథ్యంలో తెరకెక్కుతున్న ఈ చిత్రంలో గోపీచంద్ కబడ్డీ కోచ్ గా కనిపించనున్నాడు.