‘గౌతమ్ నంద’ ఈ వీకెండ్లో..‘దర్శకుడు’ ఆ వీకెండ్లో

టాలీవుడ్లో కొత్త సినిమాల రిలీజ్ డేట్ల విషయంలో నెమ్మదిగా తెరలు వీడిపోతున్నాయి. సినిమా మొత్తం పూర్తయినప్పటికీ సరైన రిలీజ్ డేట్.. టైమింగ్ కోసం చూస్తున్న చాలా సినిమాల విషయంలో దర్శక నిర్మాతలకు ఓ క్లారిటీ వచ్చేస్తోంది. ఒకదాని వెంట ఒకటి రిలీజ్ డేట్లు ఫిక్స్ చేసుకుంటున్నాయి. శరవేగంగా షూటింగ్ జరుపుకుని ఫస్ట్ కాపీతో రెడీ అయిపోయిన జగపతి బాబు సినిమాను ఈ నెల 14నే రిలీజ్ చేయడానికి ఫిక్సయిన సంగతి తెలిసిందే. అలాగే కృష్ణవంశీ లాంగ్ డిలేయ్డ్ మూవీ ‘నక్షత్రం’ను కూడా ఈ నెల 21నే రిలీజ్ చేసేయాలని చూస్తున్నారు. తాప్సి హార్రర్ థ్రిల్లర్ ‘ఆనందో బ్రహ్మ’ను ఆగస్టు 18న విడుదల చేయబోతున్నట్లు ప్రకటించారు.

ఇప్పుడు కొత్తగా ఇంకో రెండు ఇంట్రెస్టింగ్ మూవీస్ రిలీజ్ డేట్లు ఖరారు చేసుకున్నాయి. సంపత్ నంది దర్శకత్వంలో గోపీచంద్ నటించిన స్టైలిష్ యాక్షన్ ఎంటర్టైనర్ ‘గౌతమ్ నంద’ ఈ నెలాఖర్లో ప్రేక్షకుల ముందుకు రానుంది. అందరూ అనుకుంటున్నట్లే ఈ చిత్రాన్ని జులై 28న రిలీజ్ చేయబోతున్నారు. ఈ మేరకు రిలీజ్ డేట్ పోస్టర్లు కూడా బయటికి వచ్చేశాయి. అలాగే సుకుమార్ నిర్మాణంలో ఆయన మిత్రుడు హరి ప్రసాద్ జక్కా రూపొందించిన ‘దర్శకుడు’ కూడా విడుదలకు ముహూర్తం చూసుకుంది. సుకుమార్ అన్న కొడుకు అశోక్.. ఈషా రెబ్బా జంటగా నటించిన ఈ చిత్రాన్ని ఆగస్టు 4న విడుదల చేయబోతున్నారు. ఆ రోజు రానా-తేజల ‘నేనే రాజు నేనే మంత్రి’ డేట్ ఫిక్స్ చేసుకున్నప్పటికీ దానికి పోటీగా తమ సినిమాను రిలీజ్ చేయడానికి సాహసించాడు సుకుమార్.