బేబీకి గవర్నర్ సాబ్ ఫిదా

షూటింగ్ వేళ పెద్దగా బజ్ లేకున్నా.. రిలీజ్ వేళకు పాజిటివ్ టాక్ తెచ్చుకోవటమే కాదు.. ఓపెనింగ్ కు గ్రాండ్ షూరు కావటమే కాదు.. స్మార్ట్ కలెక్షన్లతో అదరగొట్టేసింది ఓ బేబీ మూవీ. ఎమోషనల్ మూవీగా పేరు తెచ్చుకోవటంతో పాటు.. విమర్శలకు ప్రశంసల్ని పొందింది. ఇప్పటికే హిట్ టాక్ తెచ్చుకున్న ఈ చిత్రాన్ని తాజాగా తెలంగాణ రాష్ట్ర గవర్నర్ నరసింహన్ ఈ సినిమాను చూశారు.

ఆసక్తికరమైన విషయం ఏమంటే.. గవర్నర్ నరసింహన్ ప్రత్యేకంగా అడిగి మరీ ఓ బేబీ సినిమాను ప్రత్యేక షో వేయించుకొని చూశారు. గవర్నర్ తో పాటు ఆయన కుటుంబ సభ్యులు ఈ సినిమాను చూశారు. రామానాయుడు స్టూడియోస్ లో ప్రత్యేకంగా వేసిన షోను చూసిన అనంతరం.. ఓ బేబీ యూనిట్ ను ఆయన అభినందించారు. సమంత నటకు.. నందిని రెడ్డి డైరెక్షన్ కు గవర్నర్ నుంచి బోలెడన్ని కాంప్లిమెంట్లు అందాయట. కుటుంబ భావోద్వేగాలు బాగా పండినట్లుగా గవర్నర్ పేర్కొన్నారు. ప్రేక్షకుల ప్రశంసలే కాదు.. ప్రముఖులను సైతం బేబీ ఫిదా చేయటం విశేషం.