'ఆడవాళ్ళు..' ట్రైలర్ లాంచ్ కోసం ఇద్దరు ప్రముఖ ఆడవాళ్ళు..!

యంగ్ అండ్ హ్యాపెనింగ్ హీరో శర్వానంద్ నటించిన ఔట్ అండ్ ఔట్ ఫ్యామిలీ ఎంటర్‌టైనర్ ''ఆడవాళ్ళు మీకు జోహార్లు''. తిరుమల కిషోర్ దర్శకత్వంలో తెరకెక్కిన ఈ సినిమాలో రష్మిక మందన్న హీరోయిన్ గా నటించింది. ఎస్‌ఎల్‌వి సినిమాస్ బ్యానర్‌ పై సుధాకర్ చెరుకూరి ఈ చిత్రాన్ని నిర్మించారు.

మహా శివరాత్రి ఫెస్టివల్ స్పెషల్ ఎట్రాక్షన్‌ గా ఫిబ్రవరి 25న ఈ చిత్రం ప్రేక్షకుల ముందుకు రాబోతోంది. ఈ నేపథ్యంలో మూవీ ప్రమోషన్స్ జోరుగా జరుగుతున్నాయి. ఇందులో భాగంగా AMJ థియేట్రికల్ ట్రైలర్‌ ను రేపు శనివారం హైదరాబాద్‌ లోని శిల్పకళా వేదికలో గ్రాండ్ గా లాంచ్ చేయనున్నారు.

ఈ ట్రైలర్ లాంచ్ ఈవెంట్ కు ముఖ్య అతిధులుగా స్టార్ హీరోయిన్లు కీర్తి సురేష్ మరియు సాయి పల్లవి హాజరవుతారని మేకర్స్ తెలియజేసారు. వాస్తవానికి ఈ సినిమా మహిళల ప్రాధాన్యతను గొప్పతనాన్ని చెప్పబోతోంది. ఇప్పుడు ప్రమోషన్స్ లో కూడా ఇద్దరు ప్రముఖ నటీమణులను చీప్ గెస్టులుగా తీసుకురావడం ఆహ్వానించడం సినిమా థీమ్‌ ను సమర్థిస్తుంది.

తిరుమల కిషోర్ అన్ని వర్గాల ప్రేక్షకులను ఆకట్టుకునేలా ఈ సబ్జెక్ట్‌ ని డీల్ చేసారని తెలుస్తోంది. హీరోహీరోయిన్ల మధ్య ప్రేమకథతో పాటుగా.. నిజ జీవితంలో ఆడవాళ్ళ మనస్తత్వాలను.. భావోద్వేగాలను తెర మీద ఆవిష్కరించే ప్రయత్నం చేసారు.

ఖుష్బు - రాధిక శరత్‌ కుమార్ - ఊర్వశి కీలక పాత్రలు పోషిస్తున్న ఈ చిత్రంలో వెన్నెల కిషోర్ - రవిశంకర్ - సత్య - ప్రదీప్ రావత్ - ఝాన్సీ - రజిత - సత్య కృష్ణ - ఆర్‌సిఎం రాజు తదితరులు నటించారు. రాక్‌ స్టార్‌ దేవిశ్రీ ప్రసాద్‌ సంగీతం సమకూర్చగా.. సుజిత్‌ సారంగ్‌ సినిమాటోగ్రఫీ అందించారు. శ్రీకర్ ప్రసాద్ ఎడిటర్ గా వ్యవహరించారు.

ఇప్పటికే 'ఆడవాళ్ళు మీకు జోహార్లు' సినిమాకు సంబంధించిన ప్రమోషనల్ కంటెంట్ మంచి స్పందన తెచ్చుకుంది. ఈ మూవీకు బజ్ తెచ్చిపెట్టడమే కాదు.. ప్రీ రిలీజ్ బిజినెస్ బాగా జరగడానికి దోహదపడింది. శుక్రవారం సాయంత్రం మూడో పాటను.. రేపు చిత్ర ట్రైలర్ ను విడుదల చేయడానికి సన్నాహాలు జరుగుతున్నాయి.