ఆ డిప్యూటీ సీఎం మ‌హేష్ కి పెద్ద ఫ్యాన్‌!

అభిమానానికి హ‌ద్దులు ఉండ‌వ‌ని అంటుంటారు. ఇక‌, సినీతార‌ల విష‌యానికొస్తే.. స‌రిహ‌ద్దు ఉండ‌వ‌నీ, భాషా భేదాలు కూడా ఉండ‌వ‌ని నిరూపించారు ఓ గుజ‌రాతీ అభిమాని! ప్ర‌స్తుతం మురుగుదాస్ ద‌ర్శ‌క‌త్వంలో మ‌హేష్ బాబు న‌టిస్తున్న చిత్రం సంగ‌తి తెలిసిందే. ఈ ఇద్ద‌రి కాంబినేష‌న్లో వ‌స్తున్న తొలి సినిమా ఇది. మురుగుదాస్ సినిమాలంటేనే భారీ అంచ‌నాలుంటాయి. ఇక‌, ప్రిన్స్ మ‌హేష్ కు ఉన్న ఫాలోయింగ్ దానికి తోడైతే ఎలా ఉంటుంది చెప్పండీ! ఈ కాంబినేష‌న్లో తెర‌కెక్కుతున్న చిత్రం షూటింగ్ ప్ర‌స్తుతం గుజ‌రాత్ లోని అహ్మ‌దాబాద్ స‌మీపంలో జ‌రుగుతోంది. షూటింగ్ జ‌రుగుతున్న ప్రాంతానికి ఊహించని వ్య‌క్తి ఒకాయ‌న వ‌చ్చారు. దాంతో మ‌హేష్ తో స‌హా చిత్ర యూనిట్ అంతా ఆశ్చ‌ర్యపోయారు అన‌డంలో సందేహం లేదు. వ‌చ్చిన‌వారు ఎవ‌రంటే... గుజ‌రాత్ డిప్యూటీ ఛీఫ్ మినిస్ట‌ర్ నితిన్ భాయ్ ప‌టేల్‌. ఆయ‌న ఒక్క‌రే కాదండోయ్‌... స‌కుటుంబ స‌మేతంగా రావ‌డం మ‌రీ విశేషం!

మ‌హేష్ బాబు సినిమా షూటింగ్ జ‌రుగుతున్న ప్రాంతంలో ఎలాంటి రాజ‌కీయ కార్య‌క్ర‌మాలుగానీ, ప్ర‌భుత్వ కార్య‌క్ర‌మాలుగానీ లేవు. కేవ‌లం మ‌హేష్ బాబును క‌లుసుకోవ‌డానికి మాత్ర‌మే గుజ‌రాత్ డిప్యూటీ సీఎం క‌ద‌లి రావ‌డం విశేషం. మ‌హేష్ బాబు సినిమాలంటే నితిన్ భాయ్ కి చాలా ఇష్ట‌మ‌ట‌! ఆయ‌న ఫ్యామిలీకి కూడా మ‌హేష్ అంటే అభిమానమ‌ట‌. అందుకే త‌మ‌ అభిమాన హీరో షూటింగ్ అహ్మ‌దాబాద్ లో జ‌రుగుతోంద‌ని తెలుసుకున్నాక‌.. మ‌హేష్ ను క‌లుసుకోకుండా ఉండ‌లేక‌పోయార‌ట‌.

షూటింగ్ జ‌రుగుతున్న ప్ర‌దేశానికి వ‌చ్చి, మ‌హేష్ బాబుతో కాసేపు నితిన్ భాయ్ ఫ్యామిలీ మాట్లాడింది. మ‌హేష్ బాబుతో అంద‌రూ ఫొటోలు దిగారు. షూటింగ్ జ‌రుగుతున్న సినిమా గురించి వివ‌రాల‌ను ద‌ర్శ‌కుడు మురుగుదాస్ ను అడిగి తెలుసుకున్నారు. మ‌హేష్ ను క‌లుసుకోవ‌డం చాలా ఆనందంగా ఉంద‌ని నితిన్ భాయ్ ప‌టేల్ అంటున్నారు. మొత్తానికి, మ‌న ప్రిన్స్ కి కేవ‌లం తెలుగు రాష్ట్రాల్లోనే కాదు... గుజ‌రాత్ లో కూడా బాగా ఫ్యాన్ ఫాలోయింగ్ ఉంద‌న్న‌మాట‌. డెప్యూటీ సీఎం స్థాయి నాయ‌కుడు మ‌హేష్ కు ఫ్యాన్ అయ్యారంటే మాట‌లా చెప్పండీ..!

Like Us on Facebook : https://www.facebook.com/Tupakidotcom/