బాహుబలి స్టైల్ ఫాలో అవుతున్న రుద్రమదేవి

బాహుబలి కంటే ముందే తన సినిమా ‘రుద్రమదేవి’ని ప్రేక్షకుల ముందుకు తేవాలని ఎన్నెన్నో కలలు కన్నాడు గుణశేఖరుడు. కానీ అతడి ఆశ నెరవేరలేదు. కారణాలేవైనా కానీ.. బాహుబలి తర్వాత విడుదలవడం ‘రుద్రమదేవి’కి కచ్చితంగా మైనస్సే. బాహుబలి, రుద్రమదేవి.. రెండూ వార్ మూవీసే. ఐతే తనకున్న భారీ బడ్జెట్లో, గొప్ప సాంకేతిక నిపుణుల సాయంతో అద్భుతాలు చేయగలిగాడు రాజమౌళి. గుణశేఖర్ ఎంతగా కష్టపడినా ఆ స్థాయిని అందుకోవడం కష్టమేననే అభిప్రాయం అందరిలో ఉంది. కానీ గుణశేఖర్ మాత్రం తన సినిమా మీద చాలా కాన్ఫిడెంట్‌గా ఉన్నాడు. ఆగస్టులో సినిమాను రిలీజ్ చేయడానికి సన్నాహాలు చేసుకుంటున్నాడు.

రుద్రమదేవి మీద ఒకప్పుడు బాగానే ఆసక్తి ఉండేది కానీ.. చాలాసార్లు వాయిదా పడటంతో జనాలు ఇప్పుడు అంతగా ఇంట్రెస్ట్ చూపించట్లేదు. ఐతే బాహుబలి ప్రమోషన్ స్ట్రాటజీనే ఫాలో జనాల్లో క్యూరియాసిటీ పెంచాలని ప్లాన్ చేస్తున్నాడు గుణశేఖర్. సినిమాకు సంబంధించి వరుసగా ఒక్కో పోస్టర్ రిలీజ్ చేయబోతున్నాడు. ఇప్పటికే అనుష్క, అల్లు అర్జున్, రానా దగ్గుబాటిల పోస్టర్స్ రిలీజ్ చేసినప్పటికీ.. ఇప్పుడో ఈ ముగ్గురికి సంబంధించి కొత్త పోస్టర్స్‌కు తోడు.. సినిమాలోని మిగతా పాత్రలకు సంబంధించిన లుక్స్ ఒక్కొక్కటిగా పరిచయం చేయబోతున్నాడు గుణ. వచ్చే నెల రోజుల్లో భారీగా ప్రమోషన్స్ చేపట్టి.. బాహుబలి తరహాలోనే మంచి క్రేజ్ మధ్య తన సినిమాను రిలీజ్ చేయాలన్నది అతడి ప్లాన్. ఈ ప్లాన్ ఎంతవరకు వర్కవుటవుతుందో చూడాలి.