'హిరణ్యకశ్యప‌' ఇప్పట్లో లేనట్లేనా...?

క్రియేటివ్ డైరెక్టర్ గుణశేఖర్‌ ''హిరణ్యకశ్యప‌'' అనే పాన్ ఇండియా ప్రాజెక్ట్ చేస్తున్నట్లు ప్రకటించిన సంగతి తెలిసిందే. 'రుద్రమదేవి' సినిమా తర్వాత ఐదేళ్ళు గ్యాప్ తీసుకున్న గుణశేఖర్‌.. ఈ సినిమా ప్రీ ప్రొడక్షన్ వర్క్స్ పై మూడేళ్లు పనిచేసారు. దగ్గుబాటి రానా హీరోగా సురేష్ ప్రొడక్షన్ మరియు గుణ టీమ్ వర్క్స్ బ్యానర్స్ నిర్మాణంలో ఈ సినిమా సెట్స్ పైకి వెళ్లనుందని చెప్పుకున్నారు. అయితే ఇంతవరకు ఈ సినిమా గురించి మరో అప్డేట్ లేదు. రానా మాత్రం 'అరణ్య' 'విరాటపర్వం' సినిమాలు పూర్తి చేసి.. వేరే ప్రాజెక్ట్ చేయడానికి స్టార్ట్ చేయడానికి రెడీ అవుతున్నారని తెలుస్తోంది. ఈ నేపథ్యంలో గుణశేఖర్‌ 'హిరణ్యకశ్యప' కంటే ముందు మరో పాన్ ఇండియా ప్రాజెక్ట్ చేస్తున్నట్లు అధికారికంగా ప్రకటించాడు.

కోవిడ్‌ సమయంలోనూ 'హిరణ్యకశ్యప‌'కు సంబంధించిన ప్రీ ప్రొడక్షన్‌ పనులను పూర్తి చేశామని చెప్పిన గుణశేఖర్‌.. 'శాకుంతలం' అనే ఎపిక్ లవ్ స్టోరీ చేస్తున్నట్లు అనౌన్స్ చేశాడు. హోమ్ బ్యానర్ లో నీలిమ గుణ నిర్మిస్తున్న ఈ చిత్రానికి సంబంధించిన మోషన్ పోస్టర్ ని కూడా రిలీజ్ చేసాడు. 'హిరణ్యకశ్యప'లో నరసింహావతారాన్ని సాక్షాత్కరింపజేసే ముందు.. భారతాన ఆదిపర్వంలోని ఆహ్లాదకర ప్రేమకథని ఆవిష్కరిస్తున్నాని చెప్పుకొచ్చాడు. దీంతో గుణశేఖర్ డ్రీమ్ ప్రాజెక్ట్ ''హిరణ్యకశ్యప'' ఇప్పట్లో ఉండకపోవచ్చని కామెంట్స్ వినిపిస్తున్నాయి. సినిమా సినిమాకి చాలా గ్యాప్ తీసుకునే గుణశేఖర్.. ఐదేళ్లకు కానీ నెక్స్ట్ ప్రాజెక్ట్ పట్టాలెక్కించలేదు. ఇప్పుడు 'శాకుంతలం' అనే పాన్ ఇండియా మూవీ పూర్తయ్యేది ఎప్పుడు.. 'హిరణ్యకశ్యప' తీసేది ఎప్పుడు.. ఇదంతా చూస్తుంటే ఈ ప్రాజెక్ట్ గురించి కొన్నాళ్లపాటు మర్చిపోవాల్సిందే అని ఇండస్ట్రీ వర్గాల్లో కామెంట్స్ చేస్తున్నారు.