మోష‌న్ పోస్ట‌ర్ః ప‌వ‌ర్ ఫుల్ గుంటూరోడు

కొంచెం గ్యాప్ త‌ర్వాత మ‌ళ్లీ మంచు మ‌నోజ్ సంద‌డి మొద‌లు కానుంది. ఈ ఏడాది ‘శౌర్య‌’.. ‘ఎటాక్’ సినిమాల‌తో వ‌రుస‌గా రెండు ఎదురు దెబ్బ‌లు తిన్న మ‌నోజ్.. ఇప్పుడు ఒకేసారి రెండు ఇంట్రెస్టింగ్ ప్రాజెక్టులు చేస్తున్నాడు. అందులో ఒక‌టి ‘గుంటూరోడు’ కాగా.. ఇంకోటి ‘ఒక్క‌డు మిగిలాడు’. ఇందులో ముందు రిలీజ‌య్యే సినిమా ‘గుంటూరోడు’. ఈ సినిమా మోష‌న్ పోస్ట‌ర్ రిలీజ్ చేశారు. ‘క‌రెంటు తీగ’ త‌ర‌హాలో మాంచి మాస్ సినిమాలాగా క‌నిపిస్తోంది మోషన్ పోస్ట‌ర్ చూస్తుంటే. రౌడీలు త‌రుముకొస్తుంటే పెద్ద చైన్ ప‌ట్టుకుని వాళ్ల కోసం ఎదురు చూస్తున్న కండ‌ల వీరుడిగా మ‌నోజ్ ను చూపించారిందులో.

‘‘భూమి మీద దేవ‌త‌లు తిరుగుతుంటే యుద్ధాలు త‌ప్ప‌వు బావా’’.. అంటూ మ‌నోజ్ ఇంట్రెస్టింగ్ డైలాగ్ ఒక‌టి పేల్చాడు. ఆ త‌ర్వాత ‘‘యు కాంట్ కిల్ ల‌వ్ విత్ వార్.. బ‌ట్ యు కెన్ కిల్ వార్ విత్ ల‌వ్’’అనే కొటేష‌న్ చూపించారు. దీన్ని బ‌ట్టి ప్రేమ కోసం ఓ కుర్రాడు చేసే పోరాటం నేప‌థ్యంలో ఈ సినిమా సాగేలా క‌నిపిస్తోంది. ‘నా రాకుమారుడు’ ఫేమ్ ఎస్.కె.సత్య దర్శకత్వంలో ఈ చిత్రం రూపొందుతోంది. క్లాప్స్ అండ్ విజిల్స్ ఎంట‌ర్టైన్మెంట్ బేన‌ర్ మీద శ్రీ వ‌రుణ్ అట్లూరి ఈ చిత్రాన్ని నిర్మిస్తున్నాడు. శ్రీ వ‌సంత్ సంగీతాన్నందిస్తున్నాడు. ‘కంచె భామ ప్ర‌గ్యా జైశ్వాల్ మ‌నోజ్ స‌ర‌స‌న క‌థానాయిక‌గా న‌టిస్తోంది. త్వ‌ర‌లోనే ‘గుంటూరోడు’ టీజ‌ర్ కూడా రిలీజ్ చేస్తార‌ట‌.