రజనీకాంత్ ను వాడేస్తున్న జి.వి.

సూపర్ స్టార్ రజనీకాంత్ పేరును ఇప్పటి వరకు వాడుకోని నటుడంటూ ఎవరూ వుండరు. ఇప్పుడు యువ సంగీత దర్శకుడు జి.వి.ప్రకాష్ కూడా ఈ సూపర్ స్టార్ పేరునే వాడుకుని తన కొత్త చిత్రాన్ని తెరకెక్కిస్తున్నాడు. తానే ఈ చిత్రానికి సంగీతం కూడా అందిస్తున్నాడు. శ్యామ్ అంటోన్ దర్శకత్వంలో రూపొందుతున్న ఈ చిత్రం పేరు ‘నాకు ఇంకో పేరుంది’ ఇది రజనీకాంత్ నటించిన ‘బాషా’ చిత్రంలోని డైలాగ్. అలాగే ఇందులో హీరో పేరు ‘జానీ’. ఇది కూడా 80వ దశకంలో రజనీకాంత్ నటించిన చిత్రం పేరు. ఇలా రజనీకాంత్ సినిమా పేరు, అతని డైలాగును ఈ యువ సంగీత దర్శకుడు కమ్ హీరో వాడుకొని రజనీ అభిమానులను ఆకట్టుకోవాలని చూస్తున్నాడు.

ప్రస్తుతం ఈ చిత్రం పతాక సన్నిశేషాలను చిత్రీకరిస్తున్నారు. ఇందులో జి.వి.సరసన ఆనంది హీరోయిన్ గా నటిస్తోంది. గతంలో వీరిద్దరూ ‘త్రిష లేదా నయనతార’ చిత్రంలో జంటగా నటించిన విషయం తెలిసిందే. మరోసారి ఈ చిత్రంలో జతకట్టబోతున్నారు. దాదాపు నలభై రోజుల పాటు ఈ చిత్రం షూటింగ్ జరపడంతో ప్రధాన టాకీ పార్ట్ పూర్తయింది. ప్రస్తుతం చెన్నైలోనే క్లైమాక్స్ ను చిత్రీకరిస్తున్నారు. త్వరలోనే ఆడియోను విడుదల చేయడానికి చిత్ర నిర్మాణ సంస్థ లైకా ప్రొడక్షన్ ప్లాన్ చేస్తోంది. జి.వి.మాట్లాడుతూ ‘‘యాక్షన్ అండ్ కామెడీ ఎంటర్టైనర్ ఇది. చిత్రీకరణ బాగా జరుగుతుంది. మేము అనుకుంటున్న దానికంటే సినిమా చాలా బాగా వస్తుంది. రజనీకాంత్ గారి 'బాషా'లో సూపర్ హిట్ డైలాగును ఈ చిత్రానికి టైటిల్ గా పెట్టాం. సినిమా పేరుకు యువత నుంచి మంచి స్పందన లభించింది. చిత్రంలో నా పేరు జాని. 1980లో 'జాని' పేరుతో రజనీకాంత్ చిత్రం ఒకటి విడుదల అయ్యింది. త్వరలో పాటలను విడుదల చేయడానికి సన్నాహాలు చేస్తున్నాం" అన్నారు.