చిన్నవాడు రీమేక్.. అక్కడ ఎవరంటే?

సౌత్ ఇండియాలో ఏ భాషలో ఏ సినిమా మంచి విజయం సాధించినా.. పక్క భాషల వాళ్లు కళ్లు పడిపోతాయి. అందులోనూ తక్కువ బడ్జెట్లో తెరకెక్కి పెద్ద విజయం సాధించిన ప్రతి సినిమా కూడా మరో భాషలోకి రీమేక్ అయిపోతోంది. తాజాగా డీమానిటైజేషన్ ఎఫెక్ట్ తట్టుకుని కూడా తెలుగులో మంచి విజయం సాధించిన ‘ఎక్కడికి పోతావు చిన్నవాడా’ కూడా పొరుగు భాషల్లోకి వెళ్తోంది. తమిళం.. కన్నడ నుంచి ఆల్రెడీ రీమేక్ డీల్స్ కూడా పూర్తయిపోయినట్లు సమాచారం.

కన్నడలో ఎవరు హీరో అన్నది ఇంకా తేలలేదు కానీ.. తమిళంలో మాత్రం మ్యూజిక్ డైరెక్టర్ టర్న్డ్ జి.వి.ప్రకాష్ కుమార్ ‘ఎక్కడికి పోతావు చిన్నవాడా’ రీమేక్ లో హీరోగా నటిస్తున్నాడు. ఈ సినిమా రీమేక్ హక్కుల్ని అతనే సొంతం చేసుకున్నట్లు సమాచారం. ఈ కథకు తగిన దర్శకుడు సెట్టయ్యాక వేరే నిర్మాతకు రీమేక్ హక్కులు ఇచ్చి తనే హీరోగా ఈ సినిమాలో నటించాలని భావిస్తున్నాడు జి.వి.

జి.వి.ప్రకాష్ కుమార్ తమిళంలో హీరోగా పరిచయమైందే తెలుగు రీమేక్ ద్వారానే. ఇక్కడ సూపర్ హిట్టయిన ‘ప్రేమకథా చిత్రమ్’ సినిమాను ‘డార్లింగ్’ పేరుతో రీమేక్ చేయగా.. అందులో జి.వి.నే కథానాయకుడిగా నటించాడు. ఆ సినిమా సూపర్ హిట్టవడంతో అతను హీరోగా బిజీ అయిపోయాడు. మరోసారి ఇప్పుడు హార్రర్ టచ్ ఉన్న కామెడీ థ్రిల్లర్లో నటించబోతున్నాడు జి.వి. మరి ఈ సినిమా అతడికి ఎలాంటి ఫలితాన్నిస్తుందో చూడాలి.

Like Us on Facebook : https://www.facebook.com/Tupakidotcom/