హరీష్ శంకర్ కొత్త సినిమా ముచ్చట్లు..

‘దువ్వాడ జగన్నాథం’ సినిమా ఎలాంటి ఫలితాన్నందుకున్నది పక్కన పెడితే.. ఈ సినిమాతో హరీష్ శంకర్ మాత్రం ఎన్నడూ లేని స్థాయిలో వార్తల్లో నిలిచాడు. ఒక మామూలు.. రొటీన్ సినిమా తీసి.. దాని గురించి హరీష్ శంకర్ గొప్పలు చెప్పుకున్న తీరు అందరినీ ఆశ్చర్యపరిచింది. ఈ సినిమా గురించి నెగెటివ్ గా మాట్లాడిన.. రాసిన వాళ్లపై తీవ్ర స్థాయిలో అటాక్ చేశాడు హరీష్. విమర్శకుల మీద ఏ దర్శకుడూ చేయని స్థాయిలో విమర్శల దాడికి దిగాడతను. ‘డీజే’ మీద ఉన్న హైప్ వల్ల ఆ సినిమాకు మంచి ఓపెనింగ్స్ వచ్చిన మాట వాస్తవం. కానీ ఆ సినిమా కంటెంట్ విషయంలో మెజారిటీ ప్రేక్షకులు పెదవి విరిచిన మాటా వాస్తవమే. ఐతే హరీష్ అదేదీ పట్టించుకోకుండా తన వాదన తాను కొనసాగించాడు.

మొత్తానికి ‘డీజే’ కథ ముగిసింది. ఇప్పుడందరి ఫోకస్ హరీష్ శంకర్ తర్వాతి సినిమా మీద నిలిచింది. వాతావరణం చల్లబడ్డాక అయినా హరీష్ శంకర్ ‘డీజే’ విషయంలో ఆత్మపరిశీలన చేసుకుని ఉంటే అతడి తర్వాతి సినిమా బెటర్ గా తయారు కావచ్చేమో. ఈసారి కాన్సెప్ట్ బేస్డ్ సినిమా చేయబోతున్నట్లుగా ‘డీజే’ ప్రమోషన్ల సమయంలోనే చెప్పాడు హరీష్. మరి ఆ కథ ఎంత వరకు రెడీ అయిందో ఏమో కానీ.. ఇంతలోనే లొకేషన్ల వేట మొదలుపెట్టేశాడతను. తాను ప్రస్తుతం అమెరికా పర్యటనలో ఉన్న విషయాన్ని వెల్లడిస్తూ.. వాషింగ్టన్ డీసీ.. న్యూయార్క్ నగరాల్లో దిగిన ఫొటోల్ని ట్విట్టర్లో షేర్ చేశాడు హరీష్. తన కొత్త సినిమా కోసం లొకేషన్ల వేటలో ఉన్నట్లు కూడా హరీష్ వెల్లడించాడు. దీన్ని బట్టి హరీస్ కొత్త సినిమా యుఎస్ బ్యాక్ డ్రాప్ లో తెరకెక్కుతుందని అర్థమవుతోంది. మరి ఈ చిత్రంలో నటించే హీరో హీరోయిన్లెవరు.. దీని నిర్మాత ఎవరు అన్నది హరీష్ ఎప్పుడు వెల్లడిస్తాడో చూద్దాం.