దిల్ రాజు-హరీష్.. ఆ సూపర్ హిట్ రీమేక్

విజయ్ సేతుపతి - త్రిష జంటగా నటించిన తమిళ చిత్రం '96'. అక్టోబర్ 4 న రిలీజ్ అయిన ఈ లవ్ స్టొరీ హిట్ టాక్ తో దూసుకుపోతోంది. ఇక ఈ సినిమా తెలుగు రీమేక్ రైట్స్ ను దిల్ రాజు తీసుకున్నారని సినిమా రిలీజ్ కంటే ముందే వార్తలు వచ్చాయి. కానీ రీమేక్ చేస్తారాలేదా డబ్బింగ్ వెర్షన్ రిలీజ్ చేస్తారా అనే విషయంలో అప్పుడు క్లారిటీ లేదు.

తాజా సమాచారం ప్రకారం ఈసినిమా ను దిల్ రాజు రీమేక్ చేసే ఆలోచనలో ఉన్నారట. రీమేక్ ను దర్శకుడు హరీష్ శంకర్ చేతిలో పెట్టే ఆలోచనతో ఉన్నారట. ఇప్పటికే హరీష్ కు ఆఫర్ ఇచ్చాడని.. హరీష్ ఈ సినిమాను డైరెక్ట్ చేసే విషయం లో నిర్ణయం తీసుకోవలిసి ఉందని సమాచారం. దిల్ రాజు - హరీష్ కాంబినేషన్ లో వచ్చిన లాస్ట్ ఫిలిం 'డీజే - దువ్వాడ జగన్నాధం' ఆశించిన విజయం సాధించలేదు. ఇక వారిద్దరి కాంబినేషన్ లో తెరకెక్కుతుంది అనుకున్నా 'దాగుడుమూతలు' స్క్రిప్ట్ రాజుగారికి సంతృప్తి కలిగించకపోవడంతో హరీష్ ఇతర ప్రొడ్యూసర్ల కోసం వెతకడం మొదలు పెట్టాడు. నిర్మాత సెట్ అయ్యాడు అని వార్తలు వస్తున్నాయి గానీ ఇప్పటివరకూ అధికారిక ప్రకటన అయితే రాలేదు.

రీమేక్ సినిమాను హ్యాండిల్ చేయడంలో హరీష్ శంకర్ టాలెంట్ పవన్ కళ్యాణ్ తో తెరకెక్కించిన 'గబ్బర్ సింగ్' తోనే అందరికీ తెలిసింది. అందుకే దిల్ రాజు హరీష్ శంకర్ పై నమ్మకం ఉంచాడేమో. అంతే కాకుండా హిట్ ఫ్లాపులతో సంబంధం లేకుండా డైరెక్టర్ టాలెంట్ ను నమ్మే వారిలో దిల్ రాజు ఒకరు. ఎలాగూ ఇద్దరి కాంబినేషన్ లో ఇప్పటికే మూడు సినిమాలు వచ్చాయి కాబట్టి.. ఈ రీమేక్ కూడా దాదాపు ఫిక్స్ అయినట్టే.