మళ్లీ జట్టు కట్టిన 'DJ' కాంబో.. బన్నీని సరికొత్త అవతార్ లో చూపిస్తానంటున్న హరీశ్..!

ఐకాన్ స్టార్ అల్లు అర్జున్ 'పుష్ప: ది రైజ్' సినిమాతో పాన్ ఇండియా స్థాయిలో సత్తా చాటాడు. ఈ మూవీ ఎంత పెద్ద సక్సెస్ అయిందో.. అదే విధంగా బన్నీ రేంజ్ కూడా పెరిగిపోయింది. ముఖ్యంగా నార్త్ లో స్టైలిష్ స్టార్ కి విపరీతమైన ఫాలోయింగ్ ఏర్పడింది. పుష్పరాజ్ గా అతని పెర్ఫార్మన్స్ కి వారు ఫిదా అయ్యారు. ఈ నేపథ్యంలో బన్నీ క్రేజ్ ఒక్కసారిగా నెక్స్ట్ లెవల్ కు వెళ్ళిపోయింది.

'పుష్ప' తో బ్లాక్ బస్టర్ అందుకున్న తర్వాత ప్రముఖ కార్పొరేట్ కంపెనీలు అల్లు అర్జున్ చుట్టూ తిరుగుతున్నాయి. అతన్ని బ్రాండ్ అంబాసిడర్ గా నియమించుకొని.. తమ ప్రొడక్ట్స్ ను ప్రమోట్ చేసుకోడానికి ఆసక్తి కనబరుస్తున్నారు. ఇప్పటికే పలు పెద్ద కంపెనీలకు ప్రచార కర్తగా వ్యవహరిస్తున్న బన్నీ.. లేటెస్టుగా మరికొన్ని బ్రాండ్ ఎండార్స్మెంట్స్ కు సైన్ చేసాడు.

ఇటీవల రెడ్ బస్ యాప్ కోసం త్రివిక్రమ్ శ్రీనివాస్ దర్శకత్వంలో అల్లు అర్జున్ ఓ కమర్షియల్ యాడ్ షూట్ చేసిన సంగతి తెలిసిందే. అయితే ఈరోజు తాజాగా బన్నీ మరో వాణిజ్య ప్రకటన చిత్రీకరణలో పాల్గొన్నారు. దీని కోసం పవర్ ఫుల్ డైరెక్టర్ హరీష్ శంకర్ తో జత కట్టాడు.

అస్త్రా పైప్స్ కు ప్రచారకర్తగా అల్లు అర్జున్ ఈ యాడ్ ని షూట్ చేస్తున్నారు. దీని కోసం హరీష్ తో పాటుగా వరల్డ్ క్లాస్ డిఓపి సుదీప్ ఛటర్జీ వర్క్ చేస్తుండటం విశేషం. ప్రస్తుతం హైదరాబాద్ లో చిత్రీకరణ జరుగుతోంది. సెట్ లో బన్నీ మరియు డైరెక్టర్ హరీశ్ డిస్కస్ చేసుకుంటున్న కొన్ని ఫోటోలు బయటకు వచ్చాయి.

అలానే ఈ యాడ్ షూట్ కు సంబంధించిన ఓ వీడియో కూడా సోషల్ మీడియాలో చక్కర్లు కొడుతోంది. అయితే ఈ కమర్షియల్ లో ఐకాన్ స్టార్ ని మునుపెన్నడూ చూడని సరికొత్త అవతార్ లో చూడటానికి అందరూ సిద్ధంగా ఉండమని హరీష్ శంకర్ ట్విట్టర్ లో పేర్కొన్నారు.

ఇటీవల అల్లు అర్జున్ మరియు హరీష్ శంకర్ కలిసి శీతల పానీయం కంపెనీ 'కోక్' కోసం ఓ యాడ్ ను చిత్రీకరించారు. దీని కోసం థాయ్ లాండ్ వెళ్లి వచ్చారు. ఈ క్రమంలో ఇప్పుడు వీరిద్దరూ మరో కమర్షియల్ కోసం కలిశారు. గతంలో బన్నీ - హరీశ్ కాంబోలో 'డీజే-దువ్వాడ జగన్నాథమ్' వంటి బ్లాక్ బస్టర్ సినిమా వచ్చింది. భవిష్యత్ లో ఇద్దరూ కలిసి మరో మూవీ చేస్తారేమో చూడాలి.

ఏదేమైనా 'పుష్ప' తర్వాత అల్లు అర్జున్ బ్రాండ్ ఎండార్స్ మెంట్స్ లోనూ దూసుకుపోతున్నాడని స్పష్టంగా తెలుస్తుంది. సినిమా షూటింగ్స్ కూడా లేకపోవడంతో వరుసగా యాడ్ షూట్స్ చేస్తూ బిజీగా ఉన్నాడు. ప్రతీ యాడ్ షూట్ లోనూ బన్నీ తనను తాను కొత్తగా ఆవిష్కరిస్తున్నాడు.

ఇకపోతే 'పుష్ప' పార్ట్-1 సూపర్ హిట్ అవ్వడంతో రెండో భాగంపై అంచనాలు భారీగా పెరిగిపోయాయి. దీన్ని దృష్టిలో పెట్టుకుని 'పుష్ప 2' ని రూపొందించడానికి సన్నాహాలు చేస్తున్నారు. తాజా సమాచారం ప్రకారం శ్రావణ మాసంలో పూజా కార్యక్రమాలు చేస్తారని తెలుస్తోంది. అనంతరం హైదరాబాద్ లో రెగ్యులర్ షూటింగ్ ప్రారంభిస్తారు.

సుకుమార్ దర్శకత్వంలో తెరకెక్కనున్న ''పుష్ప ది రూల్'' సినిమాలో రష్మిక మందన్నా హీరోయిన్ గా నటించనుంది. మలయాళ నటుడు ఫాహాద్ ఫాజిల్ - సునీల్ - అనసూయ తదితరులు ఈ భాగంలోనూ కొనసాగనున్నారు. మరికొందరు పాపులర్ స్టార్స్ కూడా ఉంటారు. రాక్ స్టార్ దేవిశ్రీప్రసాద్ సంగీతం సమకూరుస్తున్న ఈ పాన్ ఇండియా చిత్రాన్ని మైత్రీ మూవీ మేకర్స్ బ్యానర్ పై భారీ బడ్జెట్ తో నిర్మించనున్నారు.