కేసీఆర్ ని కూడా వాడేస్తున్న హ‌రీష్ శంక‌ర్‌!

టాలీవుడ్ లో వున్న స్టార్ డైరెక్ట‌ర్ల‌లో హ్యూమ‌ర్ వున్న టాప్ డైరెక్ట‌ర్స్ త్రివిక్ర‌మ్‌, హ‌రీష్ శంక‌ర్‌. వెండితెర‌పైనే కాకుండా ప‌బ్లిక్ డొమైన్ ల‌లో వీరు వేసే పంచ్ లు చాలా స‌రదాగా వుంటాయి. ప్రీ రిలీజ్ ఈవెంట్ ల‌లో త్రివిక్ర‌మ్ వేసిన పంచ్ లు ఇప్ప‌టికీ ప‌లు టీవీ షోల్లో వైర‌ల్ అవుతూ న‌వ్విస్తూనే వున్నాయి. ఆయ‌న త‌రువాత ఆ స్థాయి హ్యూమ‌ర్ వున్న ద‌ర్శ‌కుల్లో హ‌రీష్ శంక‌ర్ శైలి ప్ర‌త్యేకం. స్వ‌త‌హాగా ర‌చ‌యిత అయిన హ‌రీష్ శంక‌ర్ వేసే పంచ్‌లు చాలా స్పాంటేనియ‌స్ గా వుంటూ సంద‌ర్బాను సారం పేలుతుంటాయి.

ఇక సోష‌ల్ మీడియా వేదిక‌గా ఆయ‌న చేసే హంగామా తెలిసిందే. షోష‌ల్ మీడియాలో చాలా యాక్టివ్ గా వుంటుంటారు హ‌రీష్ శంక‌ర్‌. త‌నపై నెటిజ‌న్‌లు కానీ మీడియా కానీ వేసే పంచ్ ల‌కు అంతే స్పాంటెనియ‌స్ గా సెటైర్లు వేస్తుంటారాయ‌న‌.

చాలా సీరియ‌స్ గా కాకుండా త‌న దైన పంథాలో ఫ‌న్ ని జ‌న‌రేట్ చేస్తూ ఆయ‌న పంచ్ లు సాగుతుంటాయి. నిర్మాత బండ్ల గ‌ణేష్ తో వివాదం స‌మ‌యంలోనూ..., రైట‌ర్‌, డైరెక్ట‌ర్ బీవీఎస్ ర‌వితో వివాదం విష‌యంలోనూ హ్యూమ‌ర్ ని యాడ్ చేసి చాలా స్మూత్ గా పంచ్ లు వేసి త‌న‌లో వున్న రైట‌ర్ ని మ‌రో సారి గుర్తు చేశారు హ‌రీష్ శంక‌ర్‌.

వివాదాల‌పైనే కాకుండా స‌మ‌కాలీన అంశాల‌పై కూడా చాలా సెటైరిక‌ల్ వేలో స్పందిస్తూ హ్యూమ‌ర్ ని పంచుతుంటారు. ఇదిలా వుంటే ద‌ర్శ‌కుడిగా, రైట‌ర్ గా త‌న‌దైన శైలిలో సినిమాలు రూపొందిస్తున్న హ‌రీష్ శంక‌ర్ ప్ర‌స్తుతం ప‌వ‌ర్ స్టార్ ప‌వ‌న్ క‌ల్యాణ్ తో 'భ‌వ‌దీయుడు భ‌గ‌త్ సింగ్' మూవీని చేయ‌బోతున్నారు. మైత్రీ మూవీ మేక‌ర్స్ అత్యంత భారీ స్థాయిలో ప్లాన్ చేసిన ఈ మూవీ అనౌన్స్ చేసి చాలా కాల‌మే అవుతున్నా ఇప్ప‌టికీ సెట్స్ పైకి వెళ్ల‌లేదు.

ఈ నేప‌థ్యంలో హ‌రీష్ శంక‌ర్ సోష‌ల్ మీడియా ట్విట్ట‌ర్ వేదిక‌గా షేర్ చేసిన ఓ వీడియో నెట్టింట వైర‌ల్ గా మారింది. 'ఎవ‌రో వెధ‌వ‌లు మాట్లాడితే మేం ప‌ట్టించుకోం. ప‌నికి మాలినోడు ఎవ‌డో మాట్లాడినా ప‌ట్టించుకోం. ప‌ట్టించుకోవాల్సిన అవ‌స‌రం వుంద‌ని కూడా మేం భావిస్తలేం'అంటూ తెలంగాణ సీఎం కేసీఆర్ చెబుతున్న వీడియోని వాడుకుని హ‌రీష్ శంక‌ర్ ఎవ‌రికో దిమ్మ‌దిరిగే పంచ్ వేసిన‌ట్టుగా స్ప‌ష్ట‌మ‌వుతోంది.

ప‌వ‌ర్ స్టార్ ప‌వ‌న్ క‌ల్యాణ్ తో హ‌రీష్ శంక‌ర్ చేయ‌నున్న క్రేజీ ప్రాజెక్ట్ 'భ‌వ‌దీయుడు భ‌గ‌త్ సింగ్‌' గ‌త కొంత కాలంగా వాయిదా ప‌డుతూ వ‌స్తోంది. ద‌స‌రా నుంచి ప‌వ‌న్ ఏపీ మొత్తం ప్ర‌త్యేకంగా యాత్ర చేయ‌నున్న నేప‌థ్యంలో 'భ‌వ‌దీయుడు.. మ‌రింత ఆల‌స్య‌మ‌య్యే అవ‌కాశాలు క‌నిపిస్తున్నాయ‌ని వార్త‌లు వినిపిస్తున్నాయి. దీనిపై ప‌వ‌న్ ఫ్యాన్స్ హ‌రీష్ శంక‌ర్ ని అడిగితే ఆయ‌న ఈ వీడియోతో స‌మాధానం చెప్పారా? లేక హ‌రీష్ శంక‌ర్ షేర్ చేసిన ఈ వీడియో వెన‌క మ‌రేదైనా వుద్దేశ్యం వుందా? అని అంతా ఆరాతీస్తున్నారు.