మీరేం అనుకున్నా.. నా వయసంతే: యువనటి

లాక్ డౌన్ టైమ్ కావడంతో సామాన్యులు, సెలబ్రటీలు అనే తేడా లేకుండా అందరికీ బోర్ కొడుతోంది. సెలబ్రిటీల విషయానికొస్తే సోషల్ మీడియాలో వీడియోలు, చిట్ చాట్‌లతో టైంపాస్ చేస్తున్నారు. నటీనటులంతా సోషల్ మీడియాలో యాక్టివ్ అయిపోయారు. తెలుగు సీరియల్స్, బిగ్‌బాస్ వంటి కార్యక్రమాలతో బుల్లితెర ప్రేక్షకులకు చేరువైన హరితేజ. ఈ మధ్య కాలంలో వెండితెర మీద వరుస సినిమాలతో దూసుకుపోతుంది. క్యారెక్టర్ నటిగా బిజీ అయిన హరితేజ ప్రస్తుతం లాక్‌డౌన్ కారణంగా ఇంటికే పరిమితం అయింది. ఇక తను కూడా తాజాగా ఇన్‌స్టాగ్రామ్ ద్వారా అభిమానులతో ముచ్చటించి తన గురించి కొన్ని ఆసక్తికరమైన విషయాలు బయట పెట్టింది. ఈ సందర్బంగా నెటిజన్లు అడిగిన పలు ప్రశ్నలకు ఓపికతో సమాధానం ఇచ్చింది.

యాంకర్, నటీమణులకు ఎదురయ్యే ప్రశ్నే హరితేజకు ఎదురైంది. ఈ సందర్భంగా ఓ నెటిజన్ `మీ వయసు ఎంతో చెప్పగలరా?` అని ప్రశ్నించాడు. దీనికి స్పందించిన హరితేజ.. `నేను చెప్పినా మీరు నమ్మరు.. నమ్మినా వినరు.. విన్నా అర్థం చేసుకోరు. నిజాలు ఎప్పుడూ నిష్ఠూరంగా ఉంటాయి. అయినా చెబుతా అంటూ.. నేను పుట్టిన తేదీ 24-02-1992 అని చెప్పింది. మరో నెటిజన్ ``హిట్` సినిమాలో షీలా పాత్రలో నటించిన మీరు నిజంగా సిగరెట్ కాల్చారా?` అని అడగగా.. హరితేజ మాట్లాడుతూ.. అవును. నిజంగానే సిగరెట్ కాల్చాను. పాత్ర డిమాండ్ మేరకు తప్పలేదని చెప్పింది. విషయం ఏంటంటే.. వికిపీడియాలో హరితేజ మూడేళ్లు ముందే పుట్టినట్లు కనిపించడం వలన నెటిజన్లు గందరగోళానికి గురవుతున్నారట. హరితేజ సమాధానాలు ప్రస్తుతం సోషల్ మీడియాలో వైరల్ అవుతున్నాయి.