భ‌జరంగీ మున్నీ.. డ్యాన్స్‌ తో ప్ర‌మోష‌న్‌

స‌ల్మాన్‌ ఖాన్ హీరోగా, సోన‌మ్ క‌పూర్ హీరోయిన్‌ గా న‌టించిన ప్రేమ్ ర‌త‌న్ ధ‌న్ పాయో .. తెలుగులో ప్రేమ్ లీల పేరుతో రిలీజ‌వుతున్న సంగ‌తి తెలిసిందే. ఈ సినిమా ప్ర‌చారం పీక్స్‌ లో ఉందిప్పుడు. స‌ల్మాన్ న‌టించిన ప్రేమ పావురాలు - ప్రేమాల‌యం చిత్రాల్ని మించి తెలుగులో హిట్ కొడుతుంద‌ని అంచ‌నాలు వేస్తున్నారు.

అయితే ఈ చిత్రంలో తెలుగు అనువాదం పాట‌లు, అందులో లిరిక్స్ మ‌రీ నాశిర‌కంగా ఉన్నాయ‌న్న విమ‌ర్శ‌లొచ్చాయి. లిప్ సింక్ కోసం పాకులాడి.. అస‌లు అర్థంప‌ర్థం లేని ప‌దాల్ని య‌థాత‌థంగా వ‌దిలేశార‌న్న విమ‌ర్శ‌లొచ్చాయి. ఏదేమైనా ప్ర‌స్తుతం స‌ల్మాన్ భాయ్ సినిమా టాలీవుడ్‌ లోనూ ప్ర‌కంప‌నాలు సృష్టిస్తోంది. చాలా కాలం త‌ర్వాత స‌ల్మాన్ సినిమాని తెలుగులో చూసుకోవ‌చ్చు అన్న ఆనందంలో అభిమానులు ఉన్నారు. అందుకే స‌ల్మాన్ త్వ‌ర‌లో హైద‌రాబాద్‌ లో అడుగుపెట్టి ప్ర‌చారార్భాటం చేయాల‌ని ఉవ్విళ్లూరుతున్నాడు.

స‌ల్మాన్‌ - సోన‌మ్ అండ్ గ్యాంగ్ త్వ‌ర‌లోనే ఇక్క‌డ దిగిపోతున్నార‌ని స‌మాచారం. అయితే ఈలోగానే రాముడికి ఉడ‌త‌సాయంలా .. భ‌జ‌రంగి భాయిజాన్ చిన్నారి మున్నీ పాత్ర‌ధారి హ‌ర్షాలీ మ‌ల్హోత్రా త‌న‌వంతు ప్ర‌చారం చేస్తోంది. ప్రేమ్ ర‌త‌న్ ధ‌న్ పాయో చిత్రంలోని ఓ పాట‌కి స్టెప్పులేసింది అమ్మ‌డు. ఆ వీడియోని ఇప్పుడు స‌ల్మాన్ ఫేస్‌ బుక్‌ లో పెట్టుకుని తెగ మురిసిపోతున్నాడు. ప్ర‌చారంలో హైప్‌ కి ఇదీ క‌లిసొస్తోంది. బాప్ రే ..!