సేతుపతి బాలీవుడ్ మూవీ ఆగిపోయిందా?

త‌మిళ స్టార్ హీరో ఒక్కో భాష‌లో త‌న‌ని తాను నిరూపించుకుంటూ ఇప్పుడు బాలీవుడ్ లోనూ స‌త్తా చాటేందుకు ప్ర‌య‌త్నిస్తున్న‌ సంగ‌తి తెలిసిందే. అక్క‌డ అందాల క‌త్రిన కైఫ్ తో క‌లిసి ఓ భారీ చిత్రంలో న‌టిస్తున్నారు. శ్రీరామ్ రాఘవన్ దర్శకత్వం వహిస్తున్న‌ ఈ చిత్రానికి `మెర్రీ క్రిస్మస్` అని టైటిల్ ని ప్ర‌క‌టించారు. సంతోష్ శివన్ సినిమాటోగ్ర‌ఫీ అందిస్తున్నారు. ముంబైకర్ తర్వాత ఈ చిత్రం విజయ్ సేతుప‌తికి రెండవ హిందీ చిత్రం అని భావించాలి.

రమేష్ తౌతాని ప్రొడక్షన్స్ (టిప్స్ ఇండస్ట్రీస్) ఈ చిత్రాన్ని నిర్మిస్తోంది. కొన‌సాగుతున్న క్రైసిస్ నేప‌థ్యంలో ఈ సినిమా చిత్రీక‌ర‌ణ ఇటీవ‌ల నిలిచిపోయింది. నిజానికి ఈ ఏడాది మే లో చిత్రీక‌ర‌ణ‌కు వెళ్లాల్సి ఉన్నా వాయిదా ప‌డింది. భారతదేశంలో రెండవ వేవ్ కొనసాగుతున్నందున ప్రణాళికను తిరిగి షెడ్యూల్ చేశారు. లాక్ డౌన్ పూర్తయిన తర్వాతే ప్లాన్ చేస్తామ‌ని.. వేగవంతమైన ప్రణాళికతో సినిమాని పూర్తి చేస్తామ‌ని నిర్మాత‌ తురాణీ వెల్ల‌డించారు.

ఇంకా ఖచ్చితమైన తేదీ తెలీదు.. అస్పష్టమైన భవిష్యత్తు .. అనూహ్య ప‌రిణామాలు అన్నిటినీ ఆపేస్తున్నాయి. భారతదేశంలో 90 శాతం మంది లాక్ డౌన్ స్థితిలో ఉన్నందున షూటింగులు క‌ష్ట‌మ‌వుతోంది. కానీ ఒకటి లేదా రెండు వారాల్లో భవిష్యత్ కార్యాచరణ ప్రణాళికపై మేము నిర్ణయిస్తాము అని తెలిపారు. ఇప్పటివరకు ఈ చిత్రం ముంబై- పూణే - గోవాలో చిత్రీక‌రించారు. విజయ్ సేతుపతి ఏప్రిల్ 15 న షూట్ ప్రారంభించాల్సి ఉందని అయితే ముంబైలో వినాశకరమైన పరిస్థితి వ‌ల్ల‌ షూట్ వాయిదా వేశామ‌ని తెలిపారు.

కత్రినా కైఫ్ ప్ర‌స్తుతం వ‌రుస సినిమాల‌తో బిజీ. తాను న‌టించిన సూర్యవంశీ రిలీజ్ కావాల్సి ఉండ‌గా మ‌రో మూడు సెట్స్ పై ఉన్నాయి. గుర్మీత్ సింగ్ - ఫోన్ బూత్ - అలీ అబ్బాస్ జాఫర్ లేడీ సూపర్ హీరో చిత్రం .. మనీష్ శర్మ టైగర్ 3 లతో బిజీగా ఉన్నారు.