ట్రైలర్ టాక్: మరో గ్యాంగ్ స్టర్ కథ

రెండు విషయాల గురించి ముందు చెప్పుకోవాలి. ఒకటి.. మన సినిమాల్లో 'రక్త చరిత్త' వంటి సినిమాలు వచ్చాక.. అప్పుడుదాకా కరుడుగట్టిన నేరస్థులు అనుకున్నవారి చరిత్రలు కూడా మాంచి రసవత్తరమైన వెండితెర గాధలుగా మలచడం అలవాటైపోయింది. రెండోది.. ఇంకా సదరు గ్యాంగస్టర్లు రౌడీ షీటర్లు ప్యాక్షనిస్టులు బతికి ఉండగానే ఇలాంటి సినిమాలు తీసి ఏం సాధిస్తారో ఎవ్వరికీ తెలియదు. అదే కోవలో ఇప్పుడొస్తున్న మరో సినిమా 'హసీనా పార్కర్'.

మొన్నటివరకు 'హసీనా' అనే పేరుతో పాపులర్ అయిన ఈ సినిమా పేరును ఇప్పుడు 'హసీనా పార్కర్' అనే పేరుకు మార్చారు. శ్రద్దా కపూర్ టైటిల్ రోల్ పోషిస్తున్న ఈ సినిమాను 'తుఫాన్' డైరక్టర్ అపూర్వ లఖియా రూపొందించాడు. మోస్ట్ వాంటెడ్ క్రిమినల్ మరియు మాఫియా డాన్ దావూద్ ఇబ్రహీం సోదరి హసీనా జీవిత కథ ఈ సినిమా. ఈమెను 1993 బాంబ్ బ్లాస్ట్ తరువాత.. తప్పించుకున్న దావూద్ కోసం పోలీసులు కాస్త ఇంటరాగేట్ చేయడంతో.. ఈ చిట్టి చెల్లెలు పెద్ద డాన్ గా మారింది. పంచ్ డైలాగులూ.. ఫైట్లతో ఈ సినిమా ట్రైలర్ ఆద్యంతం నిండిపోయిందిలే. కంటెంట్ ఏమన్నా ఉందో లేదో తెలియట్లేదు కాని.. సోలో హీరోయిన్ గా హిట్టు కొట్టేయాలని శ్రద్దా కపూర్ గట్టిగానే ప్రయత్నిస్తోంది.

దర్శకుడు అపూర్వ లాఖియా మొదటి నుండీ ఇలా గ్యాంగ్ స్టర్లు వారి ఎన్ కౌంటర్ల తాలూకు కథలను ఎంచుకుని బాగానే హిట్లు కొట్టాడు. కాని రామ్ చరణ్‌ తో తీసిన జంజీర్ రీమేక్ దగ్గరే బోల్తా పడ్డాడు. మరి ఇప్పుడు హసీనా పార్కర్ తో ఏం చేస్తాడో చూడాలి.