నా గర్వాన్ని అతడు నేలకు దించాడుః సీనియ‌ర్ న‌టుడు

ప్ర‌జ‌ల‌ను అమితంగా ప్ర‌భావితం చేసే మాధ్య‌మాల్లో సినిమా ముందు వ‌ర‌స‌లో ఉంటుంది. రెండు మూడు హిట్లు ప‌డితే ఖ‌త‌మే.. ఫుల్లుగా ఫేమ‌స్ అయిపోతారు. మ‌రి, వంద‌లాది చిత్రాల్లో న‌టించిన వారి సంగ‌తి? వాళ్లని గుర్తించలేనివారు బహు అరుదు. కానీ.. అలాంటి న‌టుడి సొంత ప్రాంతానికి చెందిన‌వారు గుర్తుప‌ట్ట‌కుండా ఉంటారా..? దాదాపు అసాధ్యమనే చెప్పాలి. కానీ.. ఈ ప‌రిస్థితిని ఎదుర్కొన్నారు బాలీవుడ్ సీనియ‌ర్ యాక్ట‌ర్ అనుప‌మ్ ఖేర్‌!

సినిమాతో ప‌రిచ‌యం ఉన్న ప్ర‌తి ఒక్క‌రికీ ఆయ‌న తెలుసు అంటే అతిశ‌యోక్తి కాదు. కానీ.. ఆయ‌న సొంత ప్రాంతానికి చెందిన ఓ వ్య‌క్తి అనుప‌మ్ ను గుర్తు పట్ట‌లేదు. అంతేకాదు.. తానెవ‌రో తెలుసా? అని అడిగిన త‌ర్వాత కూడా.. 'తెలియ‌దు' అని చెప్పాడట! ఇదే విష‌యాన్ని సోష‌ల్ మీడియా ద్వారా పంచుకున్నారు అనుప‌మ్ ఖేర్‌.

అనుప‌మ్ స్వ‌గ్రామం హిమాచ‌ల్ ప్ర‌దేశ్ లోని సిమ్లా. క‌రోనా సెకండ్ వేవ్ నేప‌థ్యంలో.. ముంబై నుంచి సిమ్లా వెళ్లిపోయారు అనుప‌మ్‌. ఇటీవ‌ల ఓ ఉద‌యాన మార్నింగ్ వాక్ కు బ‌య‌లుదేరారు. అలా వెళ్తుండ‌గా.. ఎదురుగా జ్ఞాన్ చంద్ అనే ఓ వ్య‌క్తి వ‌స్తున్నాడు. అప్పుడు ముఖానికి మాస్క్ వేసుకొని ఉన్నారట అనుప‌మ్‌. అత‌న్ని ఆగ‌మ‌ని చెప్పి, 'నేనెవరో తెలుసా?' అని అడిగారట.

దానికి.. ఆ వ్యక్తి తెలియదు అని చెప్పాడట. ఆ త‌ర్వాత మాస్క్ తీసిన అనుప‌మ్.. 'మ‌రి ఇప్పుడైనా గుర్తుప‌ట్టావా?' అని అడిగారట. దీనికి కూడా జ్ఞాన్ చంద్‌.. త‌ల అడ్డంగా ఊపేశాడ‌ట‌! ఆ క్ష‌ణంలో త‌న మ‌న‌సులో అనిపించిన భావాల‌ను ప్ర‌పంచానికి తెలిపారు. ఈ మేర‌కు సోష‌ల్ మీడియాలో ఓ పోస్టు చేశారు. దానికి ఆ వ్య‌క్తితో క‌లిసి దిగిన ఫొటోను కూడా షేర్ చేశారు.

''నేను 518 చిత్రాల్లో నటించానని గర్వంగా చెప్పుకుంటాను. నన్ను ఇండియాలో అంద‌రూ గుర్తిస్తార‌ని ఇంత‌కాలం అనుకున్నాను. కానీ.. జ్ఞాన్ చంద్ నా విశ్వాసాన్ని బ‌ద్ద‌లు కొట్టేశాడు. నేనెవ‌రో త‌న‌కు కొంచెం కూడా తెలియ‌దు. ఈ విష‌యం కాస్త బాధించినా.. ఈ అనుభ‌వం ఎంతో గొప్ప‌ది. న‌న్ను గుర్తుప‌ట్ట‌క‌పోవ‌డం వ‌ల్ల జ్ఞాన్ చంద్ నా కాళ్ల‌ను భూమ్మీదే ఉండేలా పాఠం నేర్పాడు'' అని రాశారు అనుపమ్.