అక్కినేని రీమేక్ లో కాజోల్ కంబ్యాక్

బాలీవుడ్ మేకర్స్ మహా తెలివైనవాళ్లు. కొన్నిసార్లు చాలా వెరైటీ కాన్సెప్ట్స్ తో వస్తారు కానీ వాటి మూలాలు మన తెలుగు సినిమాలోనే ఉన్నాయని తెలిసినప్పుడు ఆశ్చర్యం వేయక మానదు. 90వ దశకంలో టాప్ హీరోయిన్ గా పెత్తనం చెలాయించిన హీరోయిన్ అజయ్ దేవగన్ భార్య కాజోల్ కొంత గ్యాప్ తర్వాత కొత్త మూవీతో వస్తోంది. అదే హెలికాఫ్టర్ ఈలా. ఇదేమి పేరు అనుకోకండి. ఈలా ఆవిడ పాత్ర పేరు. దీనికి అక్కినేని నాగేశ్వర్ రావు గారికి కనెక్షన్ ఏంటి అనేగా మీ డౌట్ అక్కడికే వద్దాం.

1992లో ఎఎన్ ఆర్ హీరోగా కాలేజీ బుల్లోడు అనే సినిమా వచ్చింది. దర్శకుడు శరత్. కోట్లు సంపాదించిన ఓ వ్యాపారవేత్త ఛాంబర్ ప్రెసిడెంట్ కావడం కోసం కొడుకు చదువుతున్న కాలేజీలో అదే క్లాసులో చేరతాడు.తండ్రితో పాటు కాలేజీకి వచ్చే కొడుకు పాట్లు భలే తమాషాగా ఉంటాయి. అక్కడి నుంచి మంచి ఎంటర్ టైన్మెంట్ తో సాగుతుంది. రాజ్ కోటి సంగీతం అందించిన కాలేజీ బుల్లోడు పెద్ద మ్యూజికల్ హిట్ కూడా. ఈ సినిమా చేసే టైంకి అక్కినేని గారి వయసు అరవై దాటేసింది. అయినా కూడా హుషారైన స్టెప్స్ తో అదరగొట్టేసారు. ఆయన పిల్లలుగా హరీష్ ఇప్పటి టీవీ నటి యమున కనిపిస్తారు.

ఇప్పుడు అసలు పాయింట్ కు వద్దాం. హెలికాఫ్టర్ ఈలా అచ్చంగా ఇదే లైన్ లో సాగుతుంది. 20 ఏళ్ళ క్రితం ఆగిపోయిన తన చదువును పూర్తి చేయటం కోసం కొడుకు రిద్ది సేన్ చదువుతున్నకాలేజీ లోనే చేరుతుంది కాజల్. ఇక అక్కడి నుంచి ఒకటే అల్లరి అల్లరి. అందరు తనను మేడం అనుకుంటారు. అమ్మ ఉన్న క్లాసులో కూర్చోవడం కొడుక్కి మహా ఇబ్బందిగా ఉంటుంది. బ్యాక్ గ్రౌండ్ అంతా మార్చినప్పటికీ మెయిన్ పాయింట్ మాత్రం పైన మీరు చదివిన కాలేజీ బుల్లోడిదే. అక్కడ ఏఎన్నార్ ఇక్కడ కాజోల్ అంతే తేడా. ట్రైలర్ చూసాక దీని గురించి పూర్తి క్లారిటీ వచ్చింది. ప్రదీప్ సర్కార్ దర్శకత్వం వహించిన హెలికాఫ్టర్ ఈలా కాజోల్ దిల్వాలే తర్వాత చేసిన మూవీ. ఆఫర్స్ చాలా వస్తున్నప్పటికీ ఆచితూచి సెలెక్ట్ చేసుకుంటున్న కాజోల్ మొత్తానికి మంచి స్కోప్ ఉన్న కథనే ఎంచుకుంది. సెప్టెంబర్ 7 విడుదల కానున్న ఈ మూవీ నిర్మాతల్లో ఒకరు భాగస్వామి భర్త అజయ్ దేవగనే.