టీజర్ టాక్: తమిళ్ రాకర్స్ జిందాబాద్

యువహీరో నవీన్ చంద్ర కొత్త సినిమా 'హీరో హీరోయిన్' టీజర్ రీసెంట్ గా విడుదలైంది. పైరసీ నేపథ్యంలో ఈ సినిమా తెరకెక్కడం విశేషం. దాదాపు ఒక నిముషం డ్యూరేషన్ ఉన్న టీజర్లో సినిమా కాన్సెప్ట్ ను ఏమాత్రం దాచిపెట్టకుండా క్లియర్ గా చెప్పేశారు. హీరో సినిమాల పైరసీ బిజినెస్ చేస్తుంటాడు. హీరోయినేమో ఒక నిర్మాత కూతురు. ఇది కాన్సెప్ట్.

టీజర్ స్టార్ట్ కాగానే హీరో "మీ హీరోల సినిమాలన్నీ పైరసీ చేసేది నేనే" అంటూ అదేదో ఘనకార్యం అన్నట్టుగా గర్వంగా ఇంట్రడక్షన్ ఇచ్చుకుంటాడు. హీరోయినేమో "పైరసీ చేయడం తప్పు" అంటూ నీతులు చెప్తుంది. మరో షాట్ లో పైరసీ సంగతి తెలిసి కోపంతో ఉన్న స్టార్ హీరో అభిమానులు నవీన్ చంద్రను షాప్ లోనుండి చొక్కా పట్టుకుని బయటకు లాక్కొస్తారు.. "మా ఎన్టీఆర్ సినిమానే పైరసీ చేస్తావారా? అంటూ కొట్టడానికి రెడీ అవుతారు. నవీన్ "నెక్స్ట్ వీక్ రామ్ చరణ్ సినిమా రిలీజ్ అవుతుంది.. ఇంకా ఎక్కువగా పైరసీ చేస్తా" అంటూ ఫ్యాన్ వార్స్ ను అడ్డం పెట్టుకుని తప్పించుకుంటాడు.

ఈ కాన్సెప్ట్ తో పాటుగా "ప్రతి మగాడు ప్లే బాయే".. "ఛాన్స్ దొరికితే మేం కుక్కలమే" లాంటి కొన్ని బోల్డ్ డైలాగులు కూడా ఉన్నాయి. మరో సందర్భంలో ఇడియట్ లో రవితేజ స్టైల్ లో "ప్రొడ్యూసర్ కూతురైతే ఏంనిన్ను వదలను పైరసీనీ వదలను" అంటూ ఛాలెంజ్ కూడా చేస్తాడు. పైరసీకి బ్రాండ్ అంబాజిడర్లయిన తమిళ రాకర్స్ కు జిందాబాద్ కూడా చెప్తాడు టీజర్ చివర్లో.

లవ్ స్టొరీ అనేది కామన్ అయినా నేపథ్యం మాత్రం ఖచ్చితంగా కొత్తదే. నవీన్ చంద్ర మంచి నటుడు కాబట్టి పైరసీ చేసే వ్యక్తి పాత్రలో ఒదిగిపోయినట్టున్నాడు. సినిమాటోగ్రఫీ.. బ్యాక్ గ్రౌండ్ స్కోర్ కూడా కాన్సెప్ట్ కు తగ్గట్టుగా బాగున్నాయి. తెలుగులో రొటీన్ సినిమాలని చూసి పెదవి విరిచే ప్రేక్షకులకు ఇది డిఫరెంట్ ఫీల్ ఇచ్చే సినిమా అనే ఫీల్ కలిగించారు టీజర్ తో. మరి ఈ సినిమా అయినా పైరసీకి గురి కాకుండా ఉంటుందా అనేది వేచి చూడాలి! అంతలోపు మీరు ఈ పైరసీ.. నేపథ్యం ఉన్న ట్రైలర్ ను చూడండి. అన్నట్టు ఈ సినిమా హీరోయిన్ గాయత్రి సురేష్.. జీ. ఎస్. కార్తిక్ దర్శకుడు.