విష్వక్సేన్ డాన్స్ చూస్తే ఎన్టీఆర్ గుర్తొచ్చాడు: హీరో కార్తికేయ

విష్వక్ సేన్ మొదటి నుంచి కూడా ఇటు యూత్ కి .. అటు మాస్ ఆడియన్స్ కి కనెక్ట్ అయ్యే కథలను చేస్తూ వెళుతున్నాడు. అలా తాను ఎంచుకున్న రూట్లో ముందుకు వెళుతున్న విష్వక్ సేన్, తన తాజా చిత్రంగా 'పాగల్' చేశాడు. బెక్కెమ్ వేణుగోపాల్ నిర్మించిన ఈ సినిమాకి నరేశ్ కుప్పిలి దర్శకత్వం వహించాడు. రధన్ సమకూర్చిన బాణీలకు ఇప్పటికే మంచి రెస్పాన్స్ వచ్చింది. నివేదా పేతురాజ్ కథానాయికగా నటించిన ఈ సినిమాలో, సిమ్రన్ చౌదరి .. మేఘలేఖ ముఖ్యమైన పాత్రల్లో కనిపించనున్నారు.

ఈ నెల 14వ తేదీన ఈ సినిమాను విడుదల చేయనున్నారు. ఈ నేపథ్యంలో ఈ సినిమా ప్రీ రిలీజ్ ఈవెంట్ ను నిన్న రాత్రి హైదరాబాద్ - ఎన్ కన్వెన్షన్ లో నిర్వహించారు. భారీగా తరలివచ్చిన అభిమానుల సమక్షంలో ఈ వేడుక సాగింది. ఈ సినిమాలో చేసిన నటీనటులతో పాటు సాంకేతిక నిపుణులు, ఈ సినిమా సమర్పకుడైన దిల్ రాజుతో పాటు శ్రీవిష్ణు .. కార్తికేయ .. తేజ సజ్జా .. ఆదిత్ అరుణ్ .. అనంత శ్రీరామ్ తదితరులు హాజరయ్యారు. ముగ్గురు కథానాయికలు కలర్ఫుల్ కాస్ట్యూమ్స్ తో కనుల పండుగలా మెరిశారు.

ఈ వేదికపై హీరో కార్తికేయ మాట్లాడుతూ .. "నిర్మాత బెక్కెం వేణుగోపాల్ గారు .. దిల్ రాజు గారు ఈ పరిస్థితుల్లో ఈ సినిమాను థియేటర్లలో విడుదల చేయాలనే నిర్ణయం తీసుకోవడం నిజంగా సాహసమే. ఓ వారం రోజుల క్రితమే ఈ సినిమాకి విడుదలకి సంబంధించిన నిర్ణయం తీసుకుని, చాలా ఫాస్టుగా ప్రమోషన్లు మొదలుపెట్టేసి మంచి బజ్ తీసుకువచ్చారు. చాలా గ్రాండ్ గా ప్రీ రిలీజ్ ఈవెంటును నిర్వహిస్తున్నారు. వాళ్ల గట్స్ చూసిన తరువాత నాలాంటి వాళ్లకు హోప్స్ పెరుగుతాయనడంలో ఎలాంటి సందేహం లేదు.

విష్వక్ సేన్ నాకు బాగా తెలుసు .. తన మనసులో ఏది ఉంటే అది బయటికి చెప్పేస్తాడు. బయట ఎంత జన్యూన్ గా ఉంటాడో, యాక్టింగ్ కూడా అంతే జన్యూన్ గా చేస్తాడు. ఇంతవరకూ తను ఎక్కువగా మాస్ సినిమాలే చేస్తూ వచ్చాడు. ఫ్యామిలీ ఆడియన్స్ కూడా చూసే ఒక సినిమా చేయవచ్చు గదా అని ఒకసారి ఆయనతో అన్నాను కూడా. ఇది యూత్ .. మాస్ తో పాటు ఫ్యామిలీ ఆడియన్స్ కూడా చూసే సినిమా. ఇందులో ముగ్గురు హీరోయిన్స్ తో చేశాడు .. అదే నాకు కాస్త జెలసీగా ఉంది. ఈ సినిమాలో ఆయన మరింత ఎనర్జీతో డాన్సులు ఇరగదీశాడు. తెరపై ఆయన డాన్సులు చూస్తుంటే నాకు ఎన్టీఆర్ గుర్తుకు వచ్చాడు. 14వ తేదీన వస్తున్న ఈ సినిమా తప్పకుండా హిట్ అవుతుంది" అని చెప్పుకొచ్చాడు.