ఆక‌స్మికం.. డెబ్యూ హీరో ఈవెంట్ ర‌ద్దు

సూపర్‌స్టార్ కృష్ణ మనవడు గల్లా అశోక్ న‌టించిన తొలి సినిమా హీరో సంక్రాంతి కానుక‌గా విడుద‌ల‌వుతున్న సంగ‌తి తెలిసిందే. ఈ సినిమా కోసం అశోక్ చాలా శ్ర‌మించారు. న‌ట‌న డ్యాన్సులు స‌హా ప్ర‌తిదీ త‌ర్ఫీదు పొంది హీరోగా ఎంట్రీ ఇస్తున్నారు. సంక్రాంతికి మూవీ రిలీజ్ తేదీని ఫిక్స్ చేసి యువ‌హీరో ప్ర‌మోష‌న్స్ లో బిజీగా ఉన్నారు.

నేడు తిరుప‌తి వేదిక‌గా ప్రీరిలీజ్ ఈవెంట్ కి భారీ ఏర్పాట్లు చేసుకున్నారు. అయితే స‌డెన్ గా ఈ ఈవెంట్ ని క్యాన్సిల్ చేశారు. దీనికి కార‌ణం నేడు ఆక‌స్మికంగా సూప‌ర్ స్టార్ కృష్ణ పెద్ద కుమారుడు ఘ‌ట్ట‌మ‌నేని ర‌మేష్ బాబు మృతి చెందార‌న్న వార్త‌ను వెలువ‌డ‌డం హీరో టీమ్ ని క‌ల‌చివేసింది. తాజాగా ఈవెంట్ ర‌ద్దు నిర్ణ‌యాన్ని టీమ్ ప్ర‌క‌టించింది.

మాజీమంత్రి గల్లా అరుణకుమారి మనవడు.. ఎంపీ గల్లా జయదేవ్‌ కుమారుడైన గల్లా అశోక్ న‌టిస్తున్న హీరో చిత్రంలో ఇస్మార్ట్ బ్యూటీ నిధి అగ‌ర్వాల్ క‌థానాయిక‌. ల‌వ్ అండ్ ఎంట‌ర్ టైన్ మెంట్ క‌థాంశంతో శ్రీ‌రామ్ ఆదిత్య ఈ చిత్రానికి ద‌ర్శ‌క‌త్వం వ‌హించ‌గా గల్లా అరుణకుమారి, సూపర్ స్టార్ కృష్ణ సమర్పణలో అమర రాజా మీడియా అండ్ ఎంటర్ టైన్ మెంట్ పతాకంపై గల్లా పద్మావతి ఈ సినిమాను నిర్మించారు. క‌రోనా క్రైసిస్ కార‌ణంగా ఈ సినిమా రిలీజ్ అంత‌కంత‌కు ఆల‌స్య‌మైన సంగ‌తి తెలిసిందే. సంక్రాంతి బ‌రి నుంచి అనూహ్యంగా పెద్ద సినిమాలు వైదొల‌గ‌డంతో ఈ సినిమాని విడుద‌ల చేసేందుకు స‌న్నాహాలు చేస్తున్నారు.

నేడు ర‌మేష్ బాబు అంత్య‌క్రియ‌లు

న‌టుడు -నిర్మాత రమేష్‌ బాబు అంత్యక్రియలు నేటి(9 జ‌న‌వ‌రి) మధ్యాహ్నం నిర్వహించనున్నారు. ఉదయం 11 గంటల వరకు రమేష్ బాబు పార్థివ దేహాన్ని పద్మాలయా స్టూడియోస్ కి త‌ర‌లించ‌గా అక్క‌డ కుటుంబ సభ్యులు బంధుమిత్రులు చేరుకున్నారు. మధ్యాహ్నం 12 గంటల నుంచి అంతిమ‌యాత్ర కొన‌సాగుతుంది. మహాప్రస్థానంలో అంత్యక్రియలు నిర్వహిస్తారు.

కుటుంబసభ్యులు- బంధుమిత్రులు- అభిమానులు ప్ర‌స్తుతం పద్మాలయ స్టూడియోకు చేరుకుంటున్నారు. రమేష్ బాబు తల్లి ఇందిరాదేవి.. సూప‌ర్ స్టార్ కృష్ణ స‌హా కుటుంబీకులు పద్మాలయకు చేరుకున్నారు. ముర‌ళీమోహ‌న్ స‌హా ప‌లువురు సినీప్ర‌ముఖులు బౌతిక కాయానికి నివాళులు అర్పించారు. కోవిడ్ నిబంధనలకు కట్టుబడి దహన సంస్కారాల స్థలంలో గుమికూడకుండా ఉండాలని ఘ‌ట్ట‌మ‌నేని కుటుంబం అభిమానుల‌కు విజ్ఞప్తి చేసింది.