జెడి ఎందుకిలా చేశాడబ్బా ?

తమ సినిమాలకు ఓపెనింగ్స్ వస్తాయో రావో అన్న అభద్రతా భావమో లేక ఏదో ఒక వివాదం లేనిదే జనం మనవైపు చూడరన్న అనవసరమైన భయమో తెలియదు కానీ ఈ మధ్య కాలంలో పబ్లిసిటీ కోసం టాలీవుడ్ చిత్ర విచిత్రమైన పుంతలు తొక్కుతోంది. అవి సినిమాకు మంచి చేస్తే ఓకే కానీ నవ్వుల పాలయ్యే విధంగా ఉంటేనే అసలుకే మోసం వస్తుంది. హిప్పీ టీమ్ ప్రస్తుతం అదే పనిలో ఉన్నట్టు కనిపిస్తోంది.

ఆరెక్స్ 100తో యూత్ లో ఫాలోయింగ్ తెచ్చుకున్న కార్తికేయ కొత్త చిత్రం హిప్పీ రేపు విడుదల కానుంది. పెద్దగా బజ్ ఏమి లేదు. ప్రీ రిలీజ్ చేసి స్టేజి మీద చొక్కా విప్పినా సరే టాక్ బాగుంటేనే దీనికి పికప్ వచ్చేలా ఉంది. దీన్ని పసిగట్టారు కాబోలు ఓ అర్థం లేని ఎత్తుగడతో హీరోతో పాటు సీనియర్ ఆర్టిస్ట్ జెడి చక్రవర్తి నవ్వుల పాలయ్యారు

ఓ మీడియా ఛానల్ ప్రొమోషన్ కోసం ఇచ్చిన ఇంటర్వ్యూలో కార్తికేయ ఓపెన్ గా పబ్లిక్ ప్లేస్ లో చొక్కా విప్పగా పక్కనే ఉన్న జెడి కూడా తానేమి తక్కువ తినలేదు అంటూ ఏకంగా ప్యాంట్ విప్పి అక్కడి నుంచి అండర్ వేర్ తో ఎంచక్కా నడిచిపోవడం ఇప్పుడు విమర్శలకు తావిస్తోంది. హిప్పీలో ఏముందో చెప్పేందుకు సింబాలిక్ గా ఇలా చెప్పారనుకున్నా దాని అర్థం మాత్రం సినిమాలో కూడా పాత్రలు ఇలాగే గుడ్డలు విప్పుకు తిరుగుతాయా అనే కామెంట్స్ వస్తున్నాయి. కార్తికేయ అంటే అతి ఉత్సాహంతో ఉన్నాడు అనుకోవచ్చు. పాత్ర నచ్చితే తప్ప ఎంత డబ్బులు ఆఫర్ చేసినా సినిమాలు ఒప్పుకోని జెడి లాంటి సీనియర్ విలన్ ఇలా డ్రాయర్ తో షో చేయడం మాత్రం ఏమి బాలేదు.