అభిమానికి క్యాన్స‌ర్‌.. వెంకీ ప‌రామ‌ర్శ‌

విక్ట‌రీ వెంక‌టేష్‌లో ర‌క‌ర‌కాల షేడ్స్ గురించి అభిమానుల్లో నిరంత‌రం ఆస‌క్తిక‌ర చ‌ర్చ సాగుతుంది. వృత్తిగ‌త జీవితం అటుంచితే వ్య‌క్తిగ‌తంగా వెంకీలోని ధార్మిక‌త‌, ఆధ్యాత్మిక‌త‌పైనా ఆస‌క్తిగా మాట్లాడుకుంటారు. వివేకానంద.. రామ‌కృష్ణ ప‌ర‌మ‌హంస బోధ‌నల ప్ర‌భావం ఆయ‌న‌పై ఎంతో ఉంది. ధ‌నార్జ‌నే ధ్యేయంగా బంధాలు- అనుబంధాల్ని క‌డ‌తేర్చే మ‌నిషి లోకానికి ఒత్తిడి నుంచి బ‌య‌ట‌ప‌డే టిప్స్ ఎన్నో ఆయ‌న్ని క‌లిస్తే చెబుతుంటారు.

ఆ ఒక్క కోణ‌మే కాదు.. అభిమానుల కోసం మాన‌వత్వంతో స్పందించే స్వ‌భావం ఆయ‌న‌లో మెండు. తాజాగా ఆయ‌న క్యాన్స‌ర్ తో బాధ‌ప‌డుతున్న త‌న అభిమానిని ప‌రామ‌ర్శించి ఆ కుటుంబానికి ధైర్యం చెప్పారు. ఎల్‌.బి.న‌గ‌ర్ కి చెందిన త‌న అభిమాన సంఘానికి ఉపాధ్య‌క్షుడిగా ప‌ని చేస్తున్న సురేష్ లివ‌ర్ క్యాన్స‌ర్ తో బాధ ప‌డుతున్నారు. పూర్తిగా చిక్కి శ‌ల్య‌మైన ద‌శ‌లో అత‌డికి ఇంకా ఖ‌రీదైన‌ ట్రీట్ మెంట్ కొన‌సాగుతోంది. సురేష్ - వెంకీకి వీరాభిమాని. త‌న అభిమాని వేగంగా కోలుకోవాల‌ని వెంకీ ఆ కుటుంబానికి అండ‌గా నిలుస్తున్నార‌ట‌.

వెంకీ వృత్తిగ‌తంగా ప్ర‌స్తుతం ఎంత బిజీగా ఉన్నారో తెలిసిందే. ఇటీవ‌లే ఎఫ్ 2 చిత్రంతో బ్లాక్ బ‌స్ట‌ర్ విజ‌యం అందుకుని రెట్టించిన ఉత్సాహంలో ఉన్నారు. అటుపై వెంక‌టేష్ - నాగ‌చైత‌న్య క‌థానాయ‌కులుగా వెంకీ మామ ప్ర‌స్తుతం శ‌ర‌వేగంగా పూర్త‌వుతోంది. ఈ సినిమా షూటింగ్ లో వెంకీ చాలా బిజీగా ఉన్నారు. చిన్న గ్యాప్ లో ఇలా త‌న అభిమానిని ప‌రామ‌ర్శించి ధైర్యం చెప్పారు. గ‌తంలోనూ వెంకీ ఎన్నోసార్లు త‌న అభిమానుల‌ను క‌లిసి ఆప‌ద‌లో ఆదుకున్న‌ సంద‌ర్భాలున్నాయి.