ప్రైవేట్ ఆల్బమ్ లతో సెన్సేషన్ సృష్టిస్తున్న హీరోయిన్..!

టాలీవుడ్ సినీపరిశ్రమలో హీరోయిన్ హన్సిక పేరు వినిపించక చాలా రోజులైంది. అలాగే ఆమె సినిమాలలో కనిపించి కూడా దాదాపు రెండేళ్లు కావస్తుంది. సందీప్ కిషన్ సరసన 'తెనాలి రామకృష్ణ' అనే సినిమాలో చివరిసారిగా మెరిసింది. అప్పటినుండి ఏ తెలుగు సినిమాలో కూడా హన్సిక నటిస్తున్నట్లు ఎలాంటి సమాచారం లేదు. కానీ ప్రస్తుతం హన్సికకు బ్యాడ్ డేస్ నడుస్తున్నాయని చెప్పాలి. సినిమాల గురించి పక్కనపెడితే హన్సిక డిజిటల్ ప్లాట్ ఫామ్ లపై తనసత్తా చాటుతోంది. ఇటీవలే హన్సిక నటించిన రెండు ప్రైవేట్ ఆల్బమ్స్ యూట్యూబ్ వేదికగా సంచలనం సృష్టిస్తున్నాయి. ఈ మ్యూజిక్ వీడియోలు హన్సికను మళ్లీ ఫామ్ లోకి తీసుకొస్తాయనే ఆశాభావం వ్యక్తం చేస్తోంది. మూడువారాల కిందట హన్సిక 'బూటీ షేక్' అనే ప్రైవేట్ పాటలో కనిపించింది.

ఆ పాటను ప్రముఖ రాప్ సింగర్ టోనీ కక్కర్ రాసి పాడటంతో పాటు సంగీతం కూడా అందించాడు. అలాగే వీడియోలో కూడా హన్సికతో కలిసి ఆడిపాడాడు. విడుదలైన మూడు వారాల్లోనే బూటీ షేక్ సాంగ్ యూట్యూబ్‌లో 28 మిలియన్లకు పైగా వీక్షణలను పొందింది. దీనితోపాటు ఇటీవలే హన్సిక 'మజా' అనే మరో పాటతో ప్రేక్షకుల ముందుకు వచ్చింది. ప్రముఖ సింగర్ బి ప్రాక్ ఆలపించిన ఈ పాటకు జానీ సాహిత్యంతో పాటు సంగీతం అందించాడు. ఈ రొమాంటిక్ మెలోడీ పాటలో హన్సికతో పాటు గుర్మీత్ చౌదరి నటించాడు. కానీ 'బూటి షేక్' పాటకంటే త్వరగా మజా సాంగ్ సూపర్ హిట్ అందుకుంది. మజా సాంగ్ కేవలం రెండు వారాలలో 44 మిలియన్లకు పైగా వ్యూస్ పొందింది. ఈ బ్యాక్-టు-బ్యాక్ హిట్ పాటలతో హన్సిక యూట్యూబ్ సెన్సేషన్ అయింది. ఇదిలా ఉండగా.. ప్రస్తుతం హన్సిక చేతిలో పలు సినిమాలు ఉన్నట్లు తెలుస్తుంది.