లిప్ లాక్ కిస్ తో 'లవ్ ఆఫ్ మౌళి'ని పరిచయం చేసిన నవదీప్ 2.0..!

టాలెంటెడ్ యాక్టర్ నవదీప్ చాలా గ్యాప్ తర్వాత హీరోగా నటిస్తున్న సినిమా ''లవ్ మౌళి''. నవదీప్ 2.0 అని పేర్కొంటూ తనని తాను కొత్తగా ఆవిష్కరిస్తున్నట్లు చెప్పకనే చెబుతూ వస్తున్నారు. వైవిధ్యమైన ప్రమోషనల్ కంటెంట్ తో ఈ చిత్రాన్ని జనాల్లోకి తీసుకెళ్లడానికి తనవంతు ప్రయత్నం చేస్తున్నారు నవదీప్.

ఇటీవల నవదీప్ పుట్టినరోజు సందర్భంగా హ్యాండ్సమ్ హంక్ రానా దగ్గుబాటి చేతుల మీదుగా విడుదల చేసిన టైటిల్ అండ్ ఫస్ట్ లుక్ మోషన్ పోస్టర్ మంచి రెస్పాన్స్ వచ్చింది. ఇంతకుముందెన్నడూ కనిపించని సరికొత్త మేకోవర్ తో అందరినీ అవాక్కయ్యేలా చేసాడు. పొడవాటి జుట్టు.. గుబురు గడ్డంతో చాలా భిన్నంగా కనిపించాడు.

ఈ క్రమంలో ఇప్పుడు స్టార్ హీరోయిన్ కాజల్ అగర్వాల్ కిచ్లు సినిమాలో హీరోయిన్ లుక్ ని రివీల్ చేసి చిత్ర బృందానికి విషెస్ అందజేసింది. సోమవారం ప్రేమికుల దినోత్సవాన్ని పురస్కరించుకుని సందర్భంగా 'లవ్ ఆఫ్ మౌళి' పేరుతో రిలీజ్ చేసిన ఈ వీడియో బ్యూటిఫుల్ పంఖురి గిద్వానీని పరిచయం చేస్తోంది.

ఇందులో అందాల ముద్దుగుమ్మ ప్రకృతిని ఆస్వాదిస్తూ జలపాతం ముందు రకరకాల పోజులు ఇస్తూ కనిపించింది. కర్లీ హెయిర్ తో కురచ దుస్తుల్లో ఉన్న గిద్వానీ అద్భుతమైన లుక్ యువ హృదయాలను ఆకట్టుకుంటోంది. ఈ చిన్న వీడియో హీరోహీరోయిన్ల మధ్య ఇంటెన్స్ లవ్ ని కూడా ప్రెజెంట్ చేస్తోంది.

గ్లిమ్స్ చివర్లో నవదీప్ - పంఖురి గిద్వానీ జంట గాఢమైన రొమాంటిక్ లిప్ లాక్ కిస్ చేసుకోవడం వారి మధ్య బలమైన ప్రేమను తెలియజేస్తుంది. 'లవ్ ఆఫ్ మౌళి' వీడియోకి నేపథ్య సంగీతం మరియు ఫ్రెష్ విజువల్స్ అదనపు ఆకర్షణగా నిలిచాయి.

'లవ్ మౌళి' చిత్రానికి అవనీంద్ర దర్శకత్వం వహిస్తున్నారు. నైరా క్రియేషన్స్ బ్యానర్‌ పై ప్రశాంత్ రెడ్డి తాటికొండ నిర్మిస్తున్నారు. గోవింద్ వసంత సంగీతం సమకూరుస్తుండగా.. అనంత్ శ్రీరామ్ సాహిత్యం అందిస్తున్నారు.

కిరణ్ మామిడి ఆర్ట్ డైరెక్టర్ గా వర్క్ చేస్తున్న ఈ సినిమాకి డైరెక్టర్ అవనీంద్ర ఎడిటింగ్ చేస్తుండటం గమనార్హం. ప్రమోషనల్ కంటెంట్‌ తో మంచి బజ్‌ ని క్రియేట్ చేస్తున్న ''లవ్ మౌళి'' చిత్రాన్ని త్వరలోనే ప్రేక్షకుల ముందుకు తీసుకురానున్నారు.