'ప్రభాస్ రోజూ పెసరట్టు మాత్రమే తిని జీవించాడు'

యంగ్ రెబల్ స్టార్ ప్రభాస్ లోని కంప్లీట్ మాస్ యాంగిల్ ని బయటపెట్టిన సినిమా 'బుజ్జిగాడు'. డాషింగ్ డైరెక్టర్ పూరీ జగన్నాథ్ దర్శకత్వం వహించిన ఈచిత్రంలో ప్రభాస్ స్వాగ్ ని అంత ఈజీగా ఎవరు మర్చిపోలేరు. అప్పటి వరకు ఒక టైపులో యాక్టింగ్ చేసుకుంటూ వచ్చిన ప్రభాస్.. ఒక్కసారిగా తనలోని మరో కోణాన్ని బయటకు తీసిన సినిమా ఇది. ఇందులో డార్లింగ్ డైలాగ్ డెలివరీ.. బాడీ లాంగ్వేజ్ చాలా డిఫరెంట్ గా ఉంటాయి. ఫస్ట్ టైం సిక్స్ ప్యాక్ బాడీలో కనిపించి అందరినీ ఆశ్చర్య పరిచిన ప్రభాస్.. దీని కోసం భారీ వర్కవుట్స్ చేసి పర్ఫెక్ట్ ఫిజిక్ లోకి మారిపోయాడు. అయితే దీని కోసం స్వతహాగా మాంచి భోజన ప్రియుడైన ప్రభాస్.. తనకు నచ్చిన చాలా రుచికరమైన వంటకాలను వదులుకోవాల్సి వచ్చిందట.

తాజాగా హీరోయిన్ సంజన గాల్రానీ ఓ ఇంటర్వ్యూలో మాట్లాడుతూ ప్రభాస్ గురించి పలు ఆసక్తికరమైన విషయాలను వెల్లడించింది. 'బుజ్జిగాడు' చిత్రంలో సెకండ్ హీరోయిన్ గా నటించిన సంజన.. ఆ సినిమా సమయంలో ప్రభాస్ పెసరట్టు మాత్రమే తినే వాడని చెప్పింది. 'బుజ్జిగాడు' చిత్రంలో ప్రభాస్ తో కలిసి వర్క్ చేయడం గురించి మాట్లాడిన సంజన.. ''ప్రభాస్ చాలా డెడికేటెడ్ ఆర్టిస్ట్. అతను ఒక రాయల్ ఫ్యామిలీ నుంచి వచ్చాడనే సంగతి అందరికీ తెలిసిందే. కానీ అంత కష్టపడే వ్యక్తి ఏ రాయల్ ఫ్యామిలీలో దొరకడు. అతని ఫిజిక్ చూస్తే అర్థం అవుతుంది ఎంత హార్డ్ వర్క్ చేసాడు అనేది. 'బుజ్జిగాడు' సినిమాలో చాలా లీన్ గా కనిపిస్తాడు. దీని కోసం ఆయన తినే ప్రతీ దానిపై చాలా కేర్ తీసుకున్నాడు. ఆ టైంలో ప్రభాస్ కేవలం పెసరట్టు మాత్రమే తిని జీవించాడు'' అని చెప్పుకొచ్చింది.

ఇకపోతే ప్రభాస్ 'బాహుబలి' సినిమా తర్వాత పాన్ ఇండియా స్టార్ గా మారిపోయాడు. ఇటీవలే 'రాధే శ్యామ్' సినిమా షూటింగ్ పూర్తి చేసి 2022 సంక్రాంతి కానుకగా జనవరి 14న విడుదల చేస్తున్నట్టు ప్రకటించారు. ఇదే క్రమంలో నాగ్ ఆశ్విన్ తో 'ప్రాజెక్ట్ K' అనే పాన్ వరల్డ్ చిత్రాన్ని సెట్స్ మీదకు తీసుకెళ్లారు. ప్రస్తుతం 'సలార్' చిత్ర షూటింగ్ లో పాల్గొంటున్న ప్రభాస్.. వచ్చే నెలలో 'ఆదిపురుష్' తదుపరి షెడ్యూల్ లో జాయిన్ అవుతాడు. సంజనా గల్రానీ విషయానికొస్తే.. కన్నడ సీమలో వెలుగు చూసిన డ్రగ్స్ రాకెట్ లో అరెస్ట్ కాబడిన సంజన.. కొన్ని రోజులు జైలు జీవితం గడిపి బెయిల్ పై బయటకు వచ్చింది. ఆ తర్వాత సీక్రెట్ గా పెళ్లి చేసుకొని కొత్త జీవితంలో అడుగుపెట్టిన సంజన.. మళ్ళీ సినిమాలపై ఫోకస్ పెడుతోంది.