హీరోయిన్ల వేట మొదలైంది

సూపర్ స్టార్ మహేష్ బాబు సినిమా కొత్తది ఏదైనా అనౌన్స్ చేయడం ఆలస్యం.. ఈ టాలీవుడ్ రాజకుమారుడి పక్కన నటిస్తోందంటూ.. బాలీవుడ్ హీరోయిన్ల పేర్లు తెగ వినిపించేస్తుంటాయి. బాలీవుడ్ సుందరాంగులు కూడా తెలుగులో ఎవరితో చేస్తారంటే.. మహేష్ పేరు చెబ్తుండడమే దీనికి కారణం. అయితే.. ఇలా హిందీలో టాప్ హీరోయిన్ లను ఇక్కడి మహేష్ ఏమన్నా వరుసగా తెస్తున్నాడా అంటే అది కూడా లేదు. అతిథి తర్వాత అసలు బాలీవుడ్ వైపు చూడకుండా.. లోకల్ గానే క్యాస్టింగ్ కంప్లీట్ చేసేస్తూ ఉంటాడు మన మురారి.

ప్రస్తుతం మహేష్ చేస్తున్న బ్రహ్మోత్సవం సినిమా చివరి దశకు చేరుకుంది. ఇప్పటికున్న అంచనాల ప్రకారం మే 31న విడుదల చేయాలని ప్లాన్ చేస్తున్నారు. ఆ తర్వాత ఓ 15రోజులు గ్యాప్ తీసుకుని.. మురుగదాస్ తో మూవీ మొదలుపెట్టేయనున్నాడు సూపర్ స్టార్. దీంతో ఇప్పుడు మళ్లీ మహేష్ కోసం హీరోయిన్ల వేట మొదలైంది. ఇప్పుడు కూడా మొదట వినిపిస్తున్న పేరు బాలీవుడ్ హీరోయిన్ దే. బొద్దు నుంచి సెక్సీ ఫిగర్ గా మారిపోయిన పరిణీతి చోప్రా.. మహేష్ పక్కన హీరోయిన్ గా ఫస్ట్ ఆప్షన్ అంటున్నారు.

ఈమెతో పాటు మలయాళీ భామలు సాయి పల్లవి - కీర్తి సురేష్ లను కూడా పరిశీలిస్తున్నారు. కానీ మహేష్-మురుగదాస్ మూవీలో ఒకే హీరోయిన్ కి ఛాన్స్ ఉందట. అందుకే ముందు పరిణీతిని ట్రై చేసి, ఈమె సెట్ కాకపోతే.. సాయిపల్లవి - కీర్తి సురేష్ లలో ఒకరిని ఫైనల్ చేయనున్నారట. మరి ఈసారైనా బాలీవుడ్ భామను మహేష్ బాబు టాలీవుడ్ తెస్తాడో లేదో!