హీరోయిన్ ఉంది.. హీరో కోసం కాదు

ఓ సినిమాలో హీరో - హీరోయిన్ అనగానే.. వాళ్లిద్దరి మధ్యా రొమాన్సులు.. పాటలు ఊహించేసుకోవడంలో ఆశ్చర్యం లేదు. పైగా అక్కినేని నాగార్జున లాంటి మన్మథుడి సినిమాలో అంటే.. ఈ డోస్ ఇంకొంచెం ఎక్కువగానే ఎక్స్ పెక్ట్ చేస్తాం. కానీ ఇప్పుడు నాగ్ ఓ డిఫరెంట్ కాన్సెప్ట్ తో ఆడియన్స్ ముందుకు రాబోతున్నట్లు తెలుస్తోంది.

రామ్ గోపాల్ వర్మ దర్శకత్వంలో నాగార్జున కొత్త సినిమా స్టార్ట్ అయింది. ఓ 10 రోజుల పాటు షూటింగ్ కూడా చేసేస్తున్నారు. ఈ మూవీలో హీరోయిన్ పై రకరకాల న్యూస్ వినిపిస్తున్నాయి. మొదటగా టబును హీరోయిన్ గా తీసుకుంటారని అన్నారు. టబు ఇప్పుడు బాగా సీనియర్ అయిపోవడంతో.. నాగ్ కు బాగా అచ్చొచ్చిన అనుష్కను ఫిక్స్ చేశారనే టాక్ కూడా వినిపించింది. ఇప్పుడు లేటెస్ట్ గా యూనిట్ నుంచి వినిపిస్తున్న మాటేమిటంటే.. ఈ సినిమాలో అసలు నాగార్జునకు హీరోయిన్ ఉండదట. పోలీస్ పాత్రలో కనిపించే నాగార్జునకు.. రొమాంటిక్ సన్నివేశాలే ఉండవని అంటున్నారు.

అలాగని ఈ సినిమాలో హీరోయిన్ ఉండదని కాదు. ఆ రోల్ ఉంటుంది కానీ.. నాగార్జునకు జోడీగా మాత్రం ఉండదట. సినిమాకి అత్యంత కీలకమైన పాయింట్ ఇదేనని తెలుస్తోంది. ప్రస్తుతం ఆ రోల్ కోసం ఓ టాప్ హీరోయిన్ ను తీసుకునేందుకు వర్మ ట్రై చేస్తున్నాడు. పైగా ఈ సినిమాలో పాటలకు కూడా ఇంపార్టెన్స్ ఉండదని.. ఒక్క ఐటెం సాంగ్ తో సరిపెట్టేసే అవకాశాలున్నాయని తెలుస్తోంది.