నాని కోసం నాటీ హీరోయిన్ల వేట పూర్తి కాలేదట!

న్యాచురల్ స్టార్ నాని 'జెర్సీ' పూర్తయిన తర్వాత విక్రమ్ కుమార్ దర్శకత్వంలో నటించేందుకు గ్రీన్ సిగ్నల్ ఇచ్చాడు. మైత్రీ మూవీ మేకర్స్ బ్యానర్ వారు నిర్మిస్తున్న ఈ సినిమాలో హీరోయిన్స్ ఫెస్టివల్ ఉంటుందట. అంటే హీరోయిన్లు కలిసి పండగ చేసుకోవడం కాదు. ఐదు మంది బ్యూటీలు ఈ సినిమాలో హీరోయిన్లు గా నటిస్తారట.. దీంతో ప్రేక్షకులకు గ్లామర్ ఫెస్ట్ ఖాయం అన్నట్టే.

ఇప్పటికి విక్రమ్ అండ్ టీమ్ ముగ్గురు హీరోయిన్లను ఫైనలైజ్ చేశారట. కీర్తి సురేష్.. మేఘా ఆకాష్.. ప్రియా వారియర్ ఆ ముగ్గురు భామలట. ఈ ముగ్గురు కాక మరో ఇద్దరు బ్యూటీల కోసం తీవ్రంగా గాలిస్తున్నారట. ఈ టాపిక్ తో అస్సలు సంబంధం లేదు గానీ.. ఐదుగురు సుందరాంగులంటే అప్సరసల టైపే కదా. హిందూ మైథాలజీలో చాలామంది అప్సరసలే ఉన్నారు గానీ వారిలో ఒక ఐదు మంది మాత్రం పాపులర్. రంభ.. ఊర్వసి.. మేనక.. తిలోత్తమ.. ఘ్రుతాచి. వీరిలో కూడా మొదటి నలుగురు అందరికీ తెలిసిన పేర్లే గానీ ఐదో అప్సరస పెద్దగా జనాల్లో పాపులర్ కాదు. నాని సినిమాకు ఐదుమంది బ్యూటీలు అనుకుంటే ఇప్పటివరకూ రంభ ఊర్వసి మేనక మాత్రమె దొరికినట్టు. ఇంకా ఇద్దరు పెండింగ్. త్వరలో అప్సరసలను కూడా విక్రమ్ అండ్ టీమ్ ఫైనలైజ్ చేస్తారట.

ఇంతమంది బ్యూటీలు ఉన్నారటంటే కథలో నాని పాత్ర ఎలా ఉండొచ్చు అనేది గెస్ చేశారా..? ప్లేబాయ్ టైపు పాత్ర అని సమాచారం. అంటే మన్మధుడి స్టైల్లో ఐదుమంది అప్సరసలతో ఫుల్ రొమాన్సు చేస్తాడన్నమాట. ఆలోచిస్తుంటే విక్రమ్ ఈ సారి నాని కోసం ఘాటు కథనే రెడీ చేసినట్టు అనిపిస్తుంది కదా. కానీ ఈ మన్మధుడి స్టైల్ కథ నిజానికి స్టైలిష్ స్టార్ కోసం విక్రమ్ తయారు చేసినదట. ఫైనల్ గా నాని దగ్గరకు వచ్చిందని టాక్.