కోలీవుడ్ బ్యాడ్‌బాయ్.. ఏం చేస్తాడు పాపం?

తెర వెనుక ఏం జరుగుతోందో తెలియట్లేదు. కానీ కోలీవుడ్ బ్యాడ్ బాయ్ శింబు తన సినిమాల్ని విడుదల చేసుకోవడానికి పడుతున్న కష్టాలు అన్నీ ఇన్నీ కావు. రెండేళ్ల కిందట విడుదల కావాల్సిన అతడి సినిమా ‘వాలు’ లెక్కలేనన్నిసార్లు వాయిదా పడి.. ఎట్టకేలకు ఈ నెల 17న రిలీజ్‌కు రెడీ అయింది. ఈసారి డేటు మారే ప్రసక్తే లేదని శింబు బహిరంగ లేఖ కూడా రాయడంతో అభిమానులు సంబరాలకు రెడీ అయిపోయారు. కానీ ఈసారి కూడా సినిమా విడుదల కాదన్న సమాచారం శింబుకు, అతడి ఫ్యాన్స్‌ను షాక్‌కు గురిచేసింది.

వాలు సినిమా విడుదల హక్కులు తాము పొందామని.. మరి వేరే వాళ్లు ఎలా విడుదల చేస్తారని మ్యాజిక్ డేస్ అనే సంస్థ హైకోర్టులో పిటిషన్ దాఖలు చేయడంతో వివాదం మొదలైంది. కేసు విచారించిన హైకోర్టు.. వాలు విడుదలను తాత్కాలికంగా నిలిపివేస్తూ ఉత్తర్వులు జారీ చేసింది. కాగా ఎలాగైనా తన కొడుకు సినిమాను విడుదల చేయాలని ప్రయత్నిస్తున్న శింబు తండ్రి టి.రాజేందర్.. ఈ కేసులో తమను ప్రతివాదిగా చేర్చుకోవాలని హైకోర్టులో పిటిషన్ వేయగా.. ఆ పిటిషన్‌ను కోర్టు కొట్టివేసింది. వాలు సినిమాపై తమకు హక్కులున్నాయంటూ మరో ఐదు సంస్థలు కోర్టులో పిటిషన్లు వేయడం గమనార్హం. వీటిపై బుధవారం విచారణ జరగబోతోంది. ఇంతమంది సినిమాపై హక్కులు కలిగి ఉండటమేంటో.. ఇంతకీ తెరవెనుక ఏం జరిగిందో శింబు ఫ్యాన్స్‌కు అర్థం కావడం లేదు. ఏదేమైనా ఈ శుక్రవారం ‘వాలు’ విడుదలయ్యే అవకాశాలు మాత్రం కనిపించడం లేదు.