రిలీజ్ డేట్.. ముందు నుయ్యి వెనుక గొయ్యి

రిలీజ్ చేస్తే ఒక బాధ.. చేయకపోతే ఒక బాధ. ముందు నుయ్యి వెనుక గొయ్యి లాగే ఉంది నిర్మాతల పరిస్థితి. 500.. 1000 నోట్ల రద్దు ప్రభావం సినిమాల కలెక్షన్లపై బాగా పడింది. ఐదు రోజుల నుంచి థియేటర్లు వెలవెలబోతున్నాయి. జనాలు తమ దగ్గరున్న చిన్న నోట్లను ఖర్చు పెట్టట్లేదు. కొత్తగా వచ్చిన పెద్ద నోట్లు వినియోగం లోకి రావడానికి సమయం పడుతుంది. జనాలు నోట్ల మార్పిడిలోనే మునిగిపోయి ఉన్నారు ప్రస్తుతం. మామూలు అవసరాలే తీరని నేపథ్యంలో సినిమాలకు వచ్చే పరిస్థితి లేదు. ఈ పరిస్థితి చూసే.. ‘ఇంట్లో దెయ్యం నాకే భయం’ సినిమాను వాయిదా వేసేశాడు నిర్మాత బి.వి.ఎస్.ఎన్.ప్రసాద్. మరోవైపు ‘సాహసం శ్వాసగా సాగిపో’ సినిమాను మాత్రం యధావిధిగా శుక్రవారమే రిలీజ్ చేసేశారు. కానీ ఫలితం చూస్తే కంగారు పుట్టిస్తోంది. సినిమాకు పాజిటివ్ టాకే ఉన్నా ఆశించిన స్థాయిలో కలెక్షన్లు లేవు. దీంతో మిగతా నిర్మాతల్లో కంగారు పట్టుకుంది. వచ్చే వారానికైనా పరిస్థితి మారుతుందా.. లేక ఇలాగే ఉంటుందా అని ఆలోచనలో పడ్డారు.

వచ్చే వారం.. ఆ తర్వాతి వారం రావాల్సిన సినిమాలన్నింటికీ ఇబ్బంది తప్పేలా లేదు. సినిమాను యధావిధిగా రిలీజ్ చేయాలా.. వాయిదా వేయాలా అని తర్జన భర్జనలు పడుతున్నారు. వచ్చే వారానికి ఒక్క ‘ఎక్కడికి పోతావు చిన్నవాడా’ మాత్రమే పక్కాగా రిలీజయ్యేలా ఉంది. విశాల్ సినిమా ‘ఒక్కడొచ్చాడు’ తర్వాతి వారానికి వాయిదా పడిపోయింది. ‘బేతాళుడు’ పరిస్థితి కొంచెం అయోమయంగా ఉంది. అలాగే ‘ఇంట్లో దయ్యం నాకేం భయం’ సినిమాను కూడా 17కు వాయిదా వేశారు కానీ.. అప్పుడు కూడా డౌటే అంటున్నారు. తర్వాతి వారానికి వాయిదా వేసే ఆలోచన కూడా ఉంది. మరి వచ్చే వారం రావాల్సిన సినిమాలు తర్వాతి వారానికి వాయిదా పడేసరికి ఆ వారం షెడ్యూల్ అయి ఉన్న సినిమాలకు ఇబ్బంది ఎదురవుతోంది. 18 నుంచి 25కు వాయిదా పడ్డ ‘జయమ్ము నిశ్చయమ్మురా’తో పాటు ‘సప్తగిరి ఎక్స్‌ప్రెస్’ - ‘ద్వారక’ ఆ వీకెండ్లో రావాల్సి ఉన్నాయి. మరి రాబోయే రెండు వారాల్లో ఏ సినిమాలు రిలీజవుతాయో.. ఏవి వాయిదా పడతాయో చూడాలి.

Like Us on Facebook : https://www.facebook.com/Tupakidotcom/