మహానటి.. బుల్లితెరపైనా ప్రకంపనలే

మహానటి సావిత్రి మీద సినిమా తీస్తే ఎవరు చూస్తారన్నారు ఒకప్పుడు. కానీ ‘మహానటి’ చిత్రం అద్భుతమైన ఆదరణ సంపాదించుకుంది. ఎన్నో ఏళ్లుగా సినిమాలకు దూరమైన వాళ్లను కూడా ఈ చిత్రం థియేటర్లకు రప్పించింది. చిన్నా పెద్దా అని తేడా లేకుండా అందరినీ మెప్పించింది. ఒక స్టార్ హీరో సినిమా స్థాయిలో వసూళ్ల వర్షం కురిపించింది. ఇటు తెలుగు రాష్ట్రాల్లో.. అటు అమెరికాలో భారీ కలెక్షన్లు రాబట్టింది. వెండితెరపై ప్రభంజనం తర్వాత.. బుల్లితెర మీదా ‘మహానటి’ ప్రకంపనలు రేపడం విశేషం. ఈ చిత్రాన్ని గత ఆదివారం ప్రిమియర్ షోగా మా టీవీలో ప్రసారం చేశారు. దీనికి అనూహ్యమైన టీఆర్పీ రేటింగ్స్ వచ్చాయి. ఏకంగా 20.16 రేటింగ్ తెచ్చుకుంది ‘మహానటి’. ఈ మధ్య కాలంలో ఏ తెలుగు సినిమాకూ ఈ స్థాయి రేటింగ్ రాలేదు.

అసలు ఓ తెలుగు సినిమాకు 20 ప్లస్ టీఆర్పీ రేటింగ్ వచ్చి చాలా కాలమైంది. థియేటర్లలో సూపర్ హిట్టయిన చాలా సినిమాలకు బుల్లితెరపై ఆశించిన రేటింగ్ రాలేదు. కానీ ‘మహానటి’ మాత్రం టీవీల్లోనూ అనూహ్యమైన ఆదరణ సంపాదించుకుంది. ‘మహానటి’ ప్రసారమైన టైంలో మాటీవీకి 936 జీఆర్పీ వచ్చింది. ఇది ఆ ఛానెల్‌ కు రికార్డు కావడం విశేషం. సావిత్రి కథను ఎంతో మనసు పెట్టి.. ఒక యజ్ఞం లాగా వెండి తెర మీదికి తీసుకొచ్చిన ఘనత దర్శకుడు నాగ్ అశ్విన్.. వైజయంతీ మూవీస్ సంస్థ అధినేతలు అశ్వినీదత్.. ప్రియాంక.. స్వప్నలదే. బడ్జెట్ గురించి కానీ.. ఇంకో విషయం గురించి కానీ ఏమీ ఆలోచించకుండా.. ఎంతమాత్రం రాజీ పడకుండా సిన్సియర్‌ గా చేసిన ప్రయత్నానికి ప్రేక్షకులు గొప్ప ఫలితాన్నే అందించారు. ఈ చిత్రం కీర్తి సురేష్.. దుల్కర్ సల్మాన్.. సమంతలకూ గొప్ప పేరు తెచ్చిపెట్టింది. తెలుగు చలనచిత్ర చరిత్రలోనే ఈ సినిమా ఒక మైలురాయిలా నిలిచిపోయింది.